iklan

COVALIMA, HEADLINE

Alfándega Mota-Masin husu sidadaun sira importa motór tuir dalan legál

Alfándega Mota-Masin husu sidadaun sira importa motór tuir dalan legál

Diretór Autoridade Aduaneira Covalima, Nuno Nogueira. Imajen Tatoli/Celestina Teles.

COVALIMA, 18 janeiru 2024 (TATOLI) – Alfándega Mota-Masin, iha postu administrativu Tilomar, munisipiu Covalima husu sidadaun sira atu importa motorizada sira tuir dalan legál, tanba Governu la aplika taxa boot no selu tuir tipu motór nian.

Diretór Alfándega Mota-Masin, Nuno Nogueira, esplika katak prosesu atu importa motór foun husi Indonezia liuhusi fronteira Mota-Masin mak sidadaun sira lori Pemberitahuan Ekspor Barang (PEB) ho invoice hafoin Alfándega hato’o pedidu ba nasionál atu halo aprovasaun hodi lori dokumentu ba iha Diresaun Transporte Terrestre (DTT) atu prosesa motór nia dokumentu no xapa mátrikula no selu taxa.

Ba sidadaun sira ne’ebé importa motorizada uzadu nia prosesu kle’ur, tanba presiza hasai dokumentu iha Surabaia no surat Pemberitahuan Eksport Barang (PEB) ho resibu maka foin bele importa motór tama husi pontu entrada no selu taxa.

Alfándega aplika taxa ba sidadaun sira importa motór depende motór nia folin hanesan $1000 selu taxa $50, maibé to’o ohin loron seidauk importa motorizada liuhusi fronteira refere.

“Alfándega la bandu sidadaun sira atu sosa motór iha Indonézia no importa liuhusi dalan legál tanba selu taxa ba Estadu ladún boot no bele hetan dokumentu legál husi DNTT. Sosa motór ho ilegál, polísa kaptura no prosesa hodi lori bá tribunál”, nia afirma.

Tuir dadus 2022, sidadaun sira importa motorizada ualu liuhusi fronteira no iha 2023 laiha importasaun motór, maibé importa kamioneta ida no truck haat.

Sidadaun João da Costa Amaral hateten nia parte foin rona informasaun katak bele importa motór liuhusi pontu entrada Mota-Masin. “Ami foin rona informasaun husi mídia sira katak bele importa motór liuhusi ita-nian fronteira Mota-Masin. Kona-ba selu taxa ba ami la problema, importante maka bele iha dokumentu legál husi DNTT”, dehan.

Notísia relevante: Alfándega Mota-Masin arrekada reseita $431.842

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!