iklan

COVALIMA, HEADLINE

Alfándega Mota-Masin arrekada reseita $431.842

Alfándega Mota-Masin arrekada reseita $431.842

Dólar amerikanu. Imajen/Espesiál

COVALIMA, 17 janeiru 2024 (TATOLI) – Alfándega Mota-Masin rekolla reseita, entre janeiru no dezembru tinan kotuk, $431.842,5 ba kofre Estadu.

Diretór Alfándega Mota-Masin, Nuno Nogueira, dehan reseita ne’e kontribui husi sidadaun sira importa materiál kontrusaun no nesesidade bazika husi Indonézia no sasán ne’ebé sidadaun sira lori liuhusi fronteira.

“Sidadaun ne’ebé tama no sai liuhusi fronteira bainhira lori sasán nia presu liu $300, ita aplika taxa 5% no depende ba nia presu. Sidadaun ne’ebé mak lori sasán liuhusi pontu entrada fronteira Mota-Masin bainhira atu halo negósiu no nia presu la to’o $300 mós Alfándega aplika taxa ho 5%”, nia realsa.

Ho nune’e nia dehan Alfándega Covalima kontribui reseita iha tinan kotuk $431.842,5 kompara ho 2022 iha de’it 375.291,81.

Tuir planu, iha 2024 ne’e, Alfándega simu ona orientasaun husi komisáriu atu kontribui reseita millaun ida.

Funsionáriu ne’ebé serbisu iha Alfándega Mota-masin, iha postu Tilomar hamutuk 21, kompostu husi permanente na’in-20 no kontratadu ida.

Tuir dadus nasionál, Komisáriu Autoridade Aduaneira, José António Fátima Abílio, relata katak, iha 2023, arrekada reseita millaun $103,3 hosi loron 01 janeiru to’o 31 dezembru 2023.

Reseita sira ne’e mai hosi taxa importasaun millaun $33,6, taxa seletivu konsumu millaun $46,2, taxa sobre venda $22,9, penalidade $302.439,37, restante maka taxa importasaun, exportasaun no taxa aduaneira sira seluk.

Nia dehan taxa importasaun mak sa’e maka’as liu iha tinan 2023 tanba inísiu tinan hasa’e tiha taxa importasaun hosi 2,5% ba 5%, tuir mak taxa seletivu konsumu tanba iha mós verba balun sa’e hanesan bebida asukarada, enkuantu taxa sobre venda mantein.

Notísia relevante:  Alfándega arrekada reseita millaun $103 durante tinan 2023

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!