VIQUEQUE, 18 janeiru 2024 (TATOLI)—Eskola Ensinu Báziku Filiál (EBF) Falur Rate Laek, suku Loihunu, postu Ossu, munisípiu Viqueque, desde estabelese iha tinan 2015 to’o agora livru matéria aprendizajen hamutuk 11 menus.
“Livru iha maibé menus, entaun ami fó ba estudante sira hakerek tiha hotu maka foin ami esplika, ida-ne’e ami sente dezafiu ida, tanba ne’e ami presiza tebes livru,” Koodenadór EBF Falur Rate Laek, Gilberto R. G. Amaral, informa hafoin ramata inagura fasilidade eskola, kinta ne’e.
Nia haktuir, dalaruma parte eskola hetan livru 10, maibé la kompletu, nune’e hato’o ba Servisu Edukasaun.
“Ami hato’o beibeik problema livru, maibé livru mai la sufisente, nafatin nune’e livru ne’ebé daudaun iha hanesan siénsia naturál ba sétimu anu de’it, maibé ba oitavu no nonu anu livru laiha, livru edukasaun sívika mós ba sétimu anu mak iha, ne’ebé dalaruma ami tenke ba kopia maka uza hodi hanorin estudante sira,” Koordenadór aprezenta.
Notísia relevante : EBC Gumer menus livru no laiha biblioteka
Aleinde ne’e, livru matemátika daudaun ne’e iha, maibé la kompletu, livru istória iha istória Timor nian maka laiha laran hodi hanorin estudante sira, enkuantu livru artístiku mós la kompletu inklui ekipamentu prátika muzikál. Livru lian tetun, portugés no inglés ba nonu anu laiha.
“Tanba ne’e, ami husu ba Ministériu Edukasaun, se bele rezolve ona livru hodi distribui ba eskola atu profesór sira bele uza hanorin estudante sira iha eskola ida-ne’e,” nia hato’o.
Nune’e mós, nia relata, edifísiu ba terseiru siklu laiha no profesór na’in-haat de’it maka hanorin nune’e presiza aumenta profesór.
Hatan ba kestaun ne’e, Ministra Edukasaun, Dulce de Jesus, hateten, nia parte sei koordena ho dirijente eskola sira hodi haree livru sira karik bele to’o iha eskola atu profesór no estudante sira bele uza.
“Preokupasaun ba livru ne’ebé daudaun eskola sira enfrenta ne’e, depois ha’u fila bá Dili mak sei koordena ho dirijente sira hodi haree livru, karik livru sei iha, ha’u haruka bá eskola sira, nune’e profesór no estudante sira bele uza,” Ministra tenik.
Jornalista : Vitorino Lopes da Costa
Editora : Julia Chatarina
