iklan

EDUKASAUN, BOBONARO, HEADLINE, MUNISÍPIU

EBC Gumer menus livru no laiha biblioteka

EBC Gumer menus livru no laiha biblioteka

Diretora Eskola Ensinu Báziku Sentrál (EBC, sigla portugés) Gumer, suku Lourba, postu administrativu Bobonaro, munisípiu Bobonaro, Guilhermina de Jesus Gusmão. Imajen Tatoli/Sérgio da Cruz.

MALIANA, 15 agostu 2023 (TATOLI)-Eskola Ensinu Báziku Sentrál (EBC, sigla portugués) Gumer, suku Lourba, postu administrativu Bobonaro, munisípiu Bobonaro, daudaun ne’e enfrenta hela problema menus livru no laiha biblioteka atu prezerva livru.

Diretora EBC Gumer, Guillermina de Jesus Gusmão, ba Agência Tatoli, tersa ne’e, heteten problema kona-bá livru ne’e difikulta tebes ensinu aprendizajen ba estudante sira iha oras letiva.

Sala aula profesór Eskola Ensinu Báziku Sentrál (EBC, sigla portugués) Gumer, suku Lourba, postu administrativu Bobonaro, munisípiu Bobonaro. Imajen Tatoli/Sérgio da Cruz.

Dirijente eskola ne’e konfirma livru ne’ebé laiha mak hanesan CVT, arte kultura, sidadania no istória geografía.

Notísia relevante: ME sei konstrui-reabilita eskola 15 iha Bobonaro inklui EBC Tapo

“Se kuandu profesór sira mak ladún prepara planu ho di’ak, entaun wainhira nia kaer livru, labarik sira la akompaña livru, sira akompaña de’it profesór sira, ida-ne’e difikulta ba labarik sira atu aprende ka kompriende liután matéria,” nia informa ba jornalista sira.

Nune’e daudaun ne’e profesór sira rai de’it livru iha idak-idak nia meza.

“Sira-nia meza ne’e mós kondisaun ladi’ak, barak mak estraga, tanba kondisaun fatin ne’ebé mak atu rai livru la sufisiente,” nia akresenta.

Problema refere verbalmente relata ona ba parte kompetente, liuliu Servisu Munisipál Edukasaun Bobonaro, maibé to’o ágora seidauk iha resposta.

Profesór Manuel Alves, reforsa alende problema ne’e, eskola ne’e mós hasoru problema kona-bábá laiha moru protesaun no bee-moos.

Durante ne’e sira uza bee-posu hodi atende nesesidade sira hanesan; sintina, fase liman no ba merende eskolár, maibé iha tempu udan maran tanba debitu bee menus.

“Ami tenke hola be iha tanki sira-ne’ebé lori mai fa’an,” nia hatetetn.

Problema ida tán moru protesaun, nune’e fó opurtunidade animál movimienta livre iha resintu eskola nian.

“Ema balu laiha konsiénsia husik animál, iha tempu ferias dalaruma fahi husik de’it, entaun tama fali eskola labarik sira tenke servisu maka’as tanba animál soe fo’er arbiru de’it,” nia katak.

Totál estudante terseiru siklu iha EBC ne’e hamutuk na’in-304 ho totál profesór 19 no guarda eskola na’in-ida.

Notísia relevante: Edukasaun Bobonaro presiza tán karteira eskolár 165 ba eskola foun

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!