iklan

EDUKASAUN, HEADLINE, MUNISÍPIU

ME sei konstrui-reabilita eskola 15 iha Bobonaro inklui EBC Tapo

ME sei konstrui-reabilita eskola 15 iha Bobonaro inklui EBC Tapo

Kadeira no meza balu hetan estragu hafoin anin-bot sobu kalen kakuluk EBC Tapo, postu administrativu Bobonaro, munisípiu Bobonaro, iha fulan-dezembru tinan 2022. Imajen Tatoli/Sérgio da Cruz.

MALIANA, 19 jullu 2023 (TATOLI) – Ministériu Edukasaun (ME) sei konstrui no reabilita eskola ho unidade 15 inklui solusiona kondisaun Ensinu Báziku Sentrál (EBC, sigla portugés), terseiru siklu Tapo, suku Tapo, munisípiu Bobonaro.

Eskola ne’ebé tama iha lista mak hanesan Ensinu Báziku Filiál (EBF, sigla portugés) Soilesu, EBF Lebos, Edukasaun Pre-Eskolár (EPE) Oppa Villa, EPE Tutubaba, Ensinu Báziku Sentrál (EBC) Tapo, EPE Saburai, EBF Poerema, EPE Maumela, EPE Baut-Mean, EPE Taur Matan Ruak, EPE Cova Railuli, EPE Tebabui, EPE Ai-Aras, EBC Memu no EBF Anon.

“Ba 2023 ne’e munisípiu Bobonaro hetan kontrusaun eskolár no reabilitasaun 15 ho totál sala 36,” Diretór Servisu Munisipál Edukasaun Bobonaro, Crispim Moniz Lopes, informa ba Tatoli, iha k Bairru Maravilha, tersa ne’e.

Entre eskola sira-ne’ebé mensiona balun tama iha projetu komunitária ne’ebé antes ne’e Primeiru Ministru sesante, Taur Matan Ruak, halo ona lansamentu primeira pedra iha EBC Tapo-Memo.

Enkuantu balu mós sei liuhosi prosedimetu normál hanesan loke konkursu públiku ba emprezáriu sira atu konkorre.

“Ha’u hetan esplikasaun ne’e, orsamentu rihun $100 mai kraik ne’e tama iha projetu komunitáriu no rihun $100 ba leten ne’e sei tuir proseddimentu normál liuhosi konkursu públiku,” nia esplika.

Nia relata, progresu konstrusaun eskola unidade 21 ne’ebé tama iha projetu komunitária 2021, balu entrega ona xave no balun to’o agora sei iha hela faze konstrusaun nia laran hanesan EBF Mali-Ubu, EBF Odelgomo, Mazop no Gumer.

Crispim realsa, maske eskola barak mak Governu no parseiru internasionál hadi’ak ona, maibé tuir nia, iha eskola balun mós sei presiza konstrusaun foun no halo reabilitasaun tanba kondisaun la di’ak ona.

“Ita presiza tanba númeru alunu aumenta, segundu edifísiu barak mak konstrui dezde tempu Indonézia. Ita reabilita maibé kondisaun komesa aat fali ona, iha mós eskola sira seluk ne’ebé konstrui ho projetu pakote referendu iha 2009 ne’e nia kondisaun maioria la di’ak ona,” nia katak.

Maske seidauk identifika totál eskola hotu, liuliu eskola ne’ebé harii liuhosi pakote referendu ne’ebé hetan estragu, maibé nia observa katak iha Leohitu, Sibuni no Hauba kondisaun grave.

Nune’e iha loron-kuarta ne’e, Diretór Servisu Edukasaun Munisipál Bobonaro aprezenta ba Prezidente Autoridade Munisípiu Bobonaro kona-bá eskola hirak-ne’ebé afetadu hosi dezastre naturál, hanesan EBF Mape-Op, EBF Bucuk, EBF Homesel no EBF Mazop atu nune’e bele hetan apoia materiál konstrusaun ho karáter emerjénsia.

Rezolve EBC Tapo iha tinan ne’e

Diretór Servisu Edukasaun Munisipál Bobonaro, CrispiM Lopes Moniz, fó-sai katak, Ministériu Edukasaun (ME) promete rezolve EBC terseiru siklu Tapo, suku Tapo, postu administrativu Bobonaro, munisípiu Bobonaro ne’ebé hetan estragu hosi dezastre naturál iha 31 dezembru 2022.

“Ha’u ba konsulta ho Diresaun Nasionál PRKIE eskolar sira konfirma ona katak EBC Tapo mós inklui iha projetu 15 ne’ebé mak sei implementa iha 2023,” nia fó-sai.

Notísia relevante: ME seidauk hadi’a EBC Tapo ne’ebé anin sobu dezde 2022

Enkuantu EBC 3°siklu refere konstrui hosi FALINTIL-Forsa Defeza Timor-Leste (F-FDTL) iha tinan 2017 no inaugura hosi komandu F-FDTL dezde 2018.

EBC refere mós hetan ona vizita hosi Komandante Jeral FDTL, Tenente Jenerál Falur Rate Laek iha 2019.

EBC 3° Tapo pertense ba alunu sira-ne’ebe ramata sira-nia estudu siklu daruak no dala-neen iha Ensinu Báziku Filiál (EBF) suku Tapo rasik, Oe-Leu no suku Leber ho totál estudante klase oitavu to’o nonu anu na’in-174.

Notísia relevante: Anin boot sobu estraga eskola EBC Tapo

Jornalista   : Sérgio da Cruz

Editór          : Evaristo Soares Martins

iklan
iklan

Leave a Reply

iklan
error: Content is protected !!