BOBONARO, 31 dezembru 2022 (TATOLI)—Adjuntu Eskola Bázika Sentrál (EBC, sigla portgés) Tapo-Bobonaro, Leão Perreira Freitas, hateten udan no anin boot ne’ebé akontese iha sesta (30/12) kalan ne’e, sobu estraga Eskola Bazíku Sentrál (EBC) 3° siklu suku Tapo, postu administrativu Bobonaro, munisípiu Bobonaro.
Adjuntu ne’e haktuir, durante semana ida-nia laran akontese anin no udan boot iha fatin-fatin liu-liu suku tolu hanesan Oe-Leu, Tapo no Suku Leber book an ladi’ak.
Notísia Relevante:Diretór Finansa MEJD konsidera eskola iha osan sufisiente responde nesesidade
“Horikalan ne’e kuaze kalan boot ami mós lahtene, eskola ne’e anin sobu dadeer mak ami haree. Sasán sira iha laran ne’e kompletu, so nia kakuluk leten ba sala-de-aula tolu nian mak anin sobu hotu kedas. Ida mós la aproveita, hahú hosi besi ho zinkusira-ne’e sobu sai hotu, hela de’it mak kuda-kuda maibé balun kleuk hotu kedas. Depois ai-riin sira mós fera hotu tanba pankada hosi anin makaas, tanba leten todan liu fokit sai hotu,” nia informa ba Agência Tatoli, liuhosi telefónika, sábadu ne’e.
Haree ba situasaun ne’e, adjuntu eskola refere sente triste no preokupa tamba la kleur tan estudante sira hahú ona tama eskola hodi uza sala-de-aula aula atu partisipa iha enisnu aprendizajen tinan letivu 2023.
“Ha’u nu’udar adjuntu, ami-nia preokupasaun mak ne’e. Se bele parte relevante liu-liu Ministériu Edukasaun Juventude no Desportu atu mobliza no organiza fila-fali sasán sira-ne’e ho emerjénsia ba nia fátin, atu nune’e ami bele halo atividade ensinu aprendizajen ho di’ak. Se lae, ida-ne’e fó imapaktu ba ami,” nia sujere.
Enkuantu Eskola EBC 3°siklu refere konstrui hosi Forsa enjiñeira Falintíl Forsa Defeza Timor-Leste (F-FDTL) iha tinan 2017 no hetan inaugura hosi komando FDTL iha 2018.
EBC refere mós hetan ona vizita hosi Komandante Jeral FDTL, Tenente Jenerál Falur Rate Laek iha 2019 nu’udar nain ba obra refere.
EBC 3° Tapo pertense ba alunu sira ne’ebe ramata sira-nia estudu siklu daruak no dala neen iha Ensinu Bazíku Filiál (EBF) suku Tapo rasik, Oe-Leu no suku Leber ho totál estudante klase oitavu to’o nonu anu na’in-300-resin mak hala’o sira-nia estudu iha eskola refere.
Notísia Relevante: 2022, MEJD konklui projetu konstrusaun sala eskola 657
Jornalista : Sérgio da Cruz
Editór : Cancio Ximenes
