ME seidauk hadi’a EBC Tapo ne’ebé anin sobu dezde 2022
BOBONARO, 18 jullu 2023 (TATOLI) – Ministériu Edukasaun (ME) to’o agora seidauk hadi’a Ensinu Báziku Sentrál (EBC, sigla portugés) ho totál sala tolu ne’ebé anin sobu dezde 31 fulan-dezembru tinan 2022 liubá.
Profesór EBC Tapo, Casemiro Pinto, haktuir hafoin akontesimentu parte kompetente liuliu Ministériu Edukasaun haree direita ona kondisaun eskola ne’e, maibé to’o agora seidauk halo intervensaun.
Notísia relevante: Anin boot sobu estraga eskola EBC Tapo
“Ami sente triste tanba depois mai haree situasaun hirak-ne’e, laiha intervensaun ruma hosi parte kompetente. Ho akontesimentu ne’e difikulta prosesu ensinu aprendizajen ho kurríkulu ne’ebé mak estabelese hosi ministériu rasik,” nia ba Tatoli, iha Bobonaro, tersa ne’e.
Nia dehan, ho kondisaun ne’e obrigatóriu estudante terseiru siklu sira tenke muda hotu mai iha sala-neen ne’ebé pertense ba primeiru no segundu siklu nia, fahe ba turnu dadeer no lokraik.
“Iha eskola ida ne’e agrupa terseiru siklu ne’ebé agrupamentu hosi suku tolu Leber, Oe-leu no Tapo ho distánsia ne’ebé dook, tanba ne’e ita haree iha situasaun ba klima iha fatin ne’e rasik la permite katak atu eskola lokraik ne’e. Dalaruma udan sira la mai, tanba ne’e atu normaliza prosesu ensinu no AprendiZajen ne’e susar, maske ministériu ezije katak pontualidade ba kurríkulu ne’ebé estabelese ona,” manorin-na’in ne’e katak.
Xefe suku Tapo, Xavier Barreto, konfirma problema ne’e VIII Governu Konstituisionál tau ona iha planu atu hadi’ak ho karáter emerjénsia, maibé kuaze besik tinan ida mós seidauk iha intervensaun ruma.
Tanba ne’e xefe suku Xavier husu ba IX Governu liuhosi Ministériu Edukasaun atu kontinua aponta planu refere nune’e bele aselera projetu reablitasaun.
“Agora labarik sira tenke halo sira-nia eskola ne’e dadeer ho lokraik, tanba kestaun uma ne’e sei aat hela, problema mak ne’e sasán sira iha laran ne’e labele asegura hosi udan ho loro-matan,” nia hateten.
Eskola EBC 3°siklu refere konstrui hosi Forsa enjiñeira Falintil Forsa Defeza Timor-Leste (F-FDTL) iha tinan 2017 no inaugura hosi komandu F-FDTL iha 2018.
EBC refere mós hetan ona vizita hosi Komandante Jerál FDTL, Tenente Jenerál Falur Rate Laek iha 2019.
EBC 3° Tapo pertense ba alunu sira-ne’ebé ramata sira-nia estudu siklu daruak no dala-neen iha Ensinu Báziku Filiál (EBF), suku Tapo rasik, Oe-Leu no suku Leber ho totál estudante klase oitavu to’o nonu anu na’in-174 mak hala’o sira-nia estudu iha eskola refere.
Notísia relevante: Governu Distribui Materiál Konstrusaun bá Eskola Públiku Hitu
Jornalista: Sérgio da Cruz
Editór: Evaristo Soares Martins
