VIQUEQUE, 18 janeiru 2024 (TATOLI)—Fundasaun Falur Rate Laek, kinta ne’e, oferese ona karteira eskolár (meza no kadeira) hamutuk 200 ba Eskola Ensinu Báziku Filiál (EBF) Falur Rate Laek, iha suku Loihunu, postu administrativu Ossu, munisípiu Viqueque hodi estudante sira bele uza ba aula prezensiál.
Biban ne’e, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’ entrega simbólika karteira eskolár ba Ministra Edukasaun, Dulce de Jesus, hodi entrega tutan ba Administradór Viqueque, Januário Soares ‘Bolly’, responsável Servisu Edukasaun Viqueque no Kooordenadór eskola.
Hafoin ramata simu ekipamentu eskolár ne’e, Koodenadór Eskola EBF Falur Rate Laek, Gilberto R. G. Amaral, apresia ho inisiativa fundasaun, ne’ebé liuhosi Jenerál Falur bele oferese ona fasilidade ba eskola tanba durante ne’e kuantidade karteira eskolár limitadu tebes.
“Agradese ba Fundasaun Falur Rate Laek ne’ebé ho laran kama’an no fuan boot ba ami bele tulun ona eskola. Durante ne’e ami-nia kadeira no meza ne’e la sufisente ba estudante sira uza ba aula prezensiál, nune’e ha’u husu ajuda ba parte relevante, maibé seidauk iha resposta,” Koordenadór informa hafoin serimónia entrega, iha resintu eskola.
Notísia relevante : Falur Rate Laek motiva xefe suku eleitu hosi Viqueque kria planu estratéjiku
Iha biban hanesan, Ministra Edukasaun, Dulce de Jesus, hateten, fasilidade ne’ebé oferese ba eskola bele hakma’an ona Governu ninia serbisu hodi rezolve problema ida. Kontribuisaun sira-ne’e folin boot tebes ba prosesu dezenvolvimentu.
“Ha’u lori Ministériu Edukasaun, agradese tebes ba Jenerál Falur Rate Laek ne’ebé apoia ekipamentu hodi solusiona problema eskolár, liu-liu ba kadeira no meza ne’e bele tulun ona eskola,” governante ne’e hato’o.
Nune’e mós, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’, hateten, fundasaun oferese materiál ba eskola tanba sentidu domin tanba eskola ne’e tau ninia naran.
“Apoia materiál mobiliáriu ne’ebé ha’u fó ba eskola tanba sentimentu domin, la’ós tanba ha’u-nia ne’ebé tau Eskola EBF, nune’e ha’u husu estudante no profesór sira kuidadu,” nia hameno.
Totál estudante iha Eskola EBF Falur Rate Laek hamutuk na’in-441.
Jornalista : Vitorino Lopes da Costa
Editora : Julia Chatarina
