DILI, 18 janeiru 2024 (TATOLI) – Ministériu Edukasaun labele fó karta notifikasaun ba profesór kontratadu 1.499, tanba sira-nian kontratu mak remata ona iha 31 dezembru 2023.
Diretora Nasionál Rekursu Umanu, Anita Tavares de Jesus, hatete manorin sira ne’ebé nia kontratu termina ona iha 31 de dezembru 2023 ne’e laiha direitu atu hetan tan notifikasaun, tanba sira-nian kontratu hotu ona.
“Karik sira hetan notifikasaun ruma enkuantu sira-nian kontratu sei moris hela depois ministériu mak hapara de’it sira, ida ne’e maka tenke iha notifikasaun”, responsavel ne’e dehan iha Vila Verde, ohin.
“Ha’u espera katak ita-nian profesór sira hotu komprende ho didi’ak sé maka atu hetan loloos notifikasaun ne’e. Karik sira-nian kontratu maka termina ona kerdizer laiha tan ona notifikasaun ba sira. Oin seluk kuandu kontratu moris hela derepente ita hasai de’it sir, entaun ita tenke notifika sira ho esplikasaun ruma atu sira bele hatene”, salienta.
Tanba ne’e, ME laiha razaun atu hasa’i karta notifikasaun no dirijente ne’e husu ba profesór sira hotu atu mantein kalma no buka atu apoia planu no programa ME nian ne’ebé sei loke vaga bolsa rekrutamentu atu sira bele prepara aan hodi partisipa iha teste ne’e rasik.
Iha sorin seluk, portavós manorin kontratadu, Agostinho Pinto, ezije ba Ministériu Edukasaun atu fó karta notifikasaun ba profesor 1.499 atubele hatene razaun saida maka hapara sira husi serbisu nu’udar profesór kontratadu.
Agostinho Pinto salienta katak katak bainhira ministériu la responde sira-nian ezijénsia atu hetan karta notifikasaun maka sira sei nafatin marka prezensa iha eskola ne’ebé sira ida-idak hanorin ba atu halo nafatin atividade nu’udar profesór kontratadu.
“Ami hakarak ministeriu tenke fó karta notifikasaun ba ami ida-idak. Karik atu ema ida-idak bele hatene ami-nian sala no failla sira durante sai nu’udar profesór”, realsa.
Notísia relevante: Estatutu profesór kontratadu sira sei rezolve tuir lei
Jornalista: Tomé Amado
Editora: Maria Auxiliadora
