iklan

HEADLINE, KAPITÁL

TIC Timor planeia kria aplikasaun online trata karta kondusaun no kir

TIC Timor planeia kria aplikasaun online trata karta kondusaun no kir

Diretór Ezekutivu Ajénsia TIC Timor, I.P, Venâncio Pinto. Imajen/Mídia TIC Timor

DILI, 18 janeiru 2024 (TATOLI)–Ajénsia Teknolojia no Komunikasaun, Institutu Públiku (TIC Timor, I.P) planeia hodi kria aplikasaun online trata karta kondusaun no kir (folla inspesaun) ba veíkulu.

“Ami foin hetan orientasaun hosi Ministru Transporte no Komunikasaun atu kria sistema ajendamentu online trata karta kondusaun no kir,” Diretór Ezekutivu Ajénsia TIC Timor I.P, Venâncio Pinto, informa iha ámbitu lansamentu aplikasaun ajendamentu online atendimentu públiku, iha salaun Ministériu Justisa, Caicoli, kinta ne’e.

Prosesu halo aplikasaun ne’e iha faze preparasaun, enkuantu parte Diresaun Aplikasaun sira halo ona avaliasaun iha Diresaun Nasionál Transporte Terrestre (DNTT) atubele hetan rekezitu inisia sistema online ne’e.

“Ligadu ho preokupasaun liña internet, ha’u hakarak dehan TIC nia papel la’ós atu haree kona-ba internet, nein eletrisidade, maibé TIC nia papel oinsá atu asegura programa IX Governu nian kona-ba informátika no Governu eletróniku,” Diretór esklarese.

Notísia relevante : TIC Timor no MJ hakarak inisia aplikasaun online trata dokumentu pesoál

TIC Timor nu’udar ajénsia Governu nian ne’ebé asegura dadus, email, aplikasaun hosi instituisaun ida, ne’ebé Diretór institutu espera katak iha futuru operadór sira-nia hosting (servisu website) bele sentraliza hotu iha TIC Timor.

Aleinde ne’e, TIC Timor mós kria ona aplikasaun naran medical record, ne’ebé daudaun iha ona prosesu teste iha Hospital Nacional Guido Valadres (HNGV), maibé TIC Timor hakarak estabelese mós iha sistema online hodi monitoriza ai-moruk hosi nasionál to’o munisípiu.

“Bainhira ita atu tama iha dijitalizasaun ne’e ministériu hotu tenke implementa situasaun ne’e atubele ses ona hosi risku, katak foti aimoruk la kontrola, ne’e la’ós atu dun ema ida ka ema seluk maibé oinsá halo jestaun di’ak no la’o tuir sistema,” nia tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!