DILI, 19 janeiru 2024 (TATOLI)—Diretór Ezekutivu Ajénsia Dezenvolvimentu Nasionál, Institutu Públiku (ADN, I.P), Rui Lourenço da Costa, hateten, hafoin ekipa halo monitorizasaun ba projetu reabilitasaun kakuluk teminál Aeroportu Internasionál Prezidente Nicolau Lobato, Comoro, maka husu atu Governu buka empreza foun hodi kontinua projetu ne’e.
“Ami haree empreza ne’ebé hetan fiar hosi Governu laiha kapasidade atu kontinua obra ne’e tanba projetu ne’e desde kedas Governu anteriór, maibé empreza foin ezekuta de’it kuaze 15% no labele kontinua tan ona, ho ida-ne’e halo tiha pagamentu, deside termina sira-nia kontratu maibé Ministru Transporte no Komunikasaun mak asume responsabilidade hodi termina kontratu,” Rui Lourenço, hateten hafoin prienxe programa entrevista eskluziva live streaming, iha estúdiu Agência Tatoli, I.P, Farol, sesta ne’e.
Notísia relevante : Dezenvolvimentu Aeroportu Comoro iha prosesu nia laran
Nia sujere atu Governu bele buka lalais empreza foun ne’ebé iha kapasidade finanseira no administrativa hodi subtitui.
“Sujere atu buka empreza foun maibé ida ne’ebé iha kapasidade, tanba aeroportu ninia kakuluk ne’e tempu udan susar tanba bee tama. Ministru iha kompeténsia tomak hodi foti desizaun bele halo liuhosi ajusta diretu, ha’u fiar katak KAFI mós sei bele aprova liuhosi ajusta diretu hodi finaliza lalais tanba Aeroportu nu’udar ita-nia odamatan ba mundu,” nia akresenta.
Empreza Nulia, Unipesoál, Lda maka daudaun ne’e ezekuta obra kakuluk Aeroportu Comoro ho totál kontratu rihun $170, maibé foin maka finaliza kakuluk rua de’it, ho pagamentu rihun $20.
Jornalista : Antónia Gusmão
Editora : Julia Chatarina
