DILI, 19 janeiru 2024 (TATOLI)—Diresaun Nasionál Transporte Terrestre (DNTT) serbisu hamutuk ho Autoridade Aduaneira (AA)/Alfándega hodi dezenvolve sistema ASYCUDA World ba atendimentu online ba pedidu guia da marca (surat jalan).
Xefe Departamentu Sekretariadu Apoiu Tékniku Administrasaun DNTT, Nelson Sequeira Martinsiha DNTT, Nelson Sequeira Martins, hateten, daudaun ne’e tékniku hosi Alfádega fó hela treinamentu ba funsionáriu DNTT, nune’e semana oin bele utiliza sistema online.
“Sistema ASYCUDA ida-ne’e, ita foku uluk liu ba guia da marsa nian, liu-liu maluk sira ne’ebé hala’o viajen bá Indonézia no Rejiaun Administrativa Espesiál Oé-cusse Ambeno (RAEOA), hahú semana oin ba leten la presiza mai antrian iha DNTT atu hasai invoice maibé imi iha fatin ne’ebé de’it bele uza telefone hodi asesu liuhosi online,” Nelson Sequeira, informa ba Agência Tatoli, iha ninia knaar fatin, DNTT, Balide, sesta ne’e.
Notísia relevante : DNTT sei halo inskrisaun ba motorizada ne’ebé seidauk iha dokumentu
Maneira asesu sistema ne’e maka, tama iha link https://tilesw.customs.gov.tl/#/eservice/triptic/trip sei mosu kode QR sistema nian no bainhira telefone akapta kódigu, bele hatama ona dadus karreta no bele imprimi rasik ninia invoice hodi selu iha banku, maka lori fali invoice ne’e aprezenta iha DNTT hodi scan rezultadu invoice, hafoin bele prosesa nia orijinál sira hodi bele halo viajen.
“Razaun implementa sistema online ne’e atu evita ema mai antrian tan iha DNTT, maibé sira iha ne’e bele asesu no mai DNTT ne’e, hein foti de’it invoice orijinál, bele halo viajen ona,” nia akresenta.
Nia dehan, komunidade ne’ebé atu halo viajen bá Indonézia ka RAEOA iha sistema ASYCUDA, invoice ne’ebé atu selu iha banku ho montante $5 ba semana-rua no $10 ba fulan-ida.
Jornalista : Arminda Fonseca
Editora : Julia Chatarina
