Komisaun G husu ME tau atensaun ba eskola públiku menus sala-de-aula
DILI, 19 janeiru 2024 (TATOLI)—Vise Prezidente Komisaun G trata asuntu Edukasaun, Juventude, Desportu no Kultura iha Parlamentu Nasionál (PN), Deputadu Gabriel Soares, husu Ministériu Edukasaun (ME) atu tau atensaun ba eskola públiku sira-ne’ebé menus sala-de-aula.
Notísia Relevante: PN apresia ME rezolve profesór kontratadu 4000-resin ba permanente
“Ba eskola públika, se ita tau alvu normál sala-de-aula ida, ita halo tuir estandár se nia boot liu mak iha alunu 35, se lae 25. Eskola públiku, ha’u-nia alin (jornalista) bele observa iha Timor laran tomak, eskola públiku nia sala-de-aula ida-nia rásiu menus liu mak (iha alunu) 50 ne’e no nia bele to’o 60, 70 no 80. Agora ita atu halo oinsá mai rejistu bara-barak ne’e ita atu haruka fila ka, entaun simu, entaun profesór sira pasiensia, sala de aula menus, karteira menus, estudante mai,” Vise Prezidente komisaun G ne’e hateten ba Agência Tatoli iha Parlamentu Nasionál.
Tanba ne’e, presiza atensaun hosi ME hodi solusiona kestaun ne’e liuliu oinsá konstrui tan infraestrutura sala-de-aula iha eskola públiku balun ne’ebé menus sala-de-aula.
Ministra Edukasaun (ME), Dulce de Jesus, hateten menus sala-de-aula tinan barak ona sai nafatin problema, maibé ita mós tenke rekoñese katak hosi Governu ida ba Governu ida kontinua tau nafatin orsamentu iha kapitál dezenvolvimentu, atu harii eskola nune’e mós iha fundu infraestrutura no iha mós projetu komunitária
“Tinan ida-ne’e, ita mós iha kuaze millaun $3, atu kontinua harii eskola sira-ne’ebé mak seidauk iha. Maibé, tinan ida-ne’e seidauk halo modelu foun ida nafatin, tanba kuandu ami tama dezeñu ho Kadernu no Planta Enkargu (BoQ=Bill of Quantity) sira iha hotu ona. Maibé, iha 2025, ha’u ho sekretáriu Estadu (Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lemos Lopes), ami hakarak muda konseitu konstrusaun eskola ne’ebé mak sei la ba halo sala tolu ka rua konforme iha eskola ne’eba hanesan prátika agora daudaun,” nia hateten.
Maibé, nia dehan, iha tinan 2025 sei halo konseitu ida dezenvolve komplexu eskola ida-ne’eba hotu kedas.
Ezemplu, sala-de-aula hira mak presiza, tanba bazea ba kuadru pesoál ne’ebé mak halo tiha ona, depois presiza sala profesór, kuziña, biblioteka ka laboratóriu ba eskola sentrál sira, ne’ebé konseitu ne’e sei aplika iha 2025.
Tanba, halo orsamentu 2024 normalmente kuandu ita atu halo orsamentu ba infraestrutura ita tenke iha tina ona DIID, entaun DIID la konsege prepara iha 2023 no momentu ne’e submete tiha ona nune’e konseitu ne’e sei aplika iha tinan 2025.
Jornalista : Nelson de Sousa
Editór : Cancio Ximenes
