iklan

EDUKASAUN, HEADLINE

ONG Belun sei sai observadór iha prosesu rekrutamentu ba profesór sira

ONG Belun sei sai observadór iha prosesu rekrutamentu ba profesór sira

Diretór ONG Belun, Luis da Costa Ximenes. Imajen/Rttl.ep

DILI,19 janeiru 2024 (TATOLI) – Vaga ba bolsa rekrutamentu ba manorin sira iha faze dahuluk ne’ebé sei lansa iha fevereiru ne’e, Ministériu Edukasaun (ME) sei koopera ho Organizasaun Naun Governamentál (ONG) atu sai observadór independente.

Diretóra Nasionál Rekursu Umanu Ministériu Edukasaun, Anita Tavares de Jesus, informa ministériu planeia ona atu husu apoiu ONG Belun sai observadór iha prosesu tomak, hahú husi preparasaun administrativa to’o teste dijitál, nune’e labele hamosu persepsaun públika nian katak teste ne’e la transparánsia.

“Ami sei serbisu hamutuk ho sosiedade sivíl Belun hodi tau-matan ba prosesu rektutamentu bolsa kandidatu, nune’e ita bele garante transparánsia”, dirijente reitera iha Vila Verde.

Responsavel ne’e salienta katak maske iha ona ekipa júri husi ME no Komisaun Funsaun Públika, maibé presiza iha tan observadór independente ruma husi sosiedade sivíl, nune’e bele garante transparánsia.

Planu atu serbisu hamutuk ho Belun ne’e maka daudaun ME halo hela diskusaun hodi prepara fundu ruma atu aloka ba prosesu observasaun nian no tanba tempu limitadu maka sei halo esforsu hodi aselera ida ne’e.

“Ami halo ona diskusaun iha loron 17 janeiru kona-ba envolvimentu Belun nian atu mai observa prosesu teste ne’ebé ita sei halo iha fevereiru agora. Tanba ne’e, ita hakarak atu aselera hodi bele hetan lalais ninia resposta”, dehan.

Diretór ONG Belun, Luís Ximenes, hatete kooperasaun entre organizasaun no ME realiza antes ona, maibé ba serbisu hamutuk atu garante transparánsia ba teste bolsa kandidatura ne’e maka to’o agora nia parte seidauk simu informasaun.

“Ami seidauk simu informasaun katak Ministériu Edukasaun atu envolve ami atu observa iha teste bolsa kandidatu ho sistema eletróniku ne’e”, realsa.

Nia salienta katak serbisu sira rekolla dadús profesór sira iha territóriu nasionál nian ne’e Belun halo ona, inklui bolsa kandidatu ne’e rasik, tanba ne’e, ME presiza halo kooperasaun ho Komisaun Funsaun Públika.

“Ba dadus sira ne’ebé maka Belun rekolla sei submete ba Ministériu Edukasaun iha tempu besik”, promete.

Ministériu Edukasaun sei fó sai, iha fevereiru, vaga ba bolsa rekrutamentu faze dahuluk ba manorin sira iha nivel ensinu pré-eskolár no báziku hamutuk 1.500.

Notísia relevante: Vaga ba bolsa rekrutamentu ba profesór sira fó sai iha fevereiru

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!