COVALIMA, 19 janeiru 2024 (TATOLI) – Estudante Fakuldade Saúde Públika no Siénsia Médika husi Universidade da Paz (UNPAZ) organiza semináriu hodi senzibiliza informasaun kona-ba moras hada’et no lahada’et ba alunu ensinu sekundáriu sira iha Covalima.
Semináriu ho tema “Analiza Fatór Determinante sira ba Akontesimentu Moras Da’et no Lahada’et Hanesan Dezafiu ba Espetativa Vida no Moris Saudavel” ne’e hanesan projetu pilotu ne’ebé hala’o iha tinan 2024 no sei realiza iha territóriu. Semináriu ne’e organiza tanba serbisu hamutuk ho Ministériu Saúde, liuhusi Servisu Saúde Covalima no Ospitál Referál Suai.
“Ita fahe informasaun ba ita-nian estudante nivel ensinu sekundáriu tanba estajiáriu UNPAZ aprende ona saida mak moras hada’et no lahada’et, tanba-sira aprende ona siénsia no presiza atu habelar nune’e bele halo prevensaun ”, Reitór UNPAZ, Adolmando Amaral, hatete iha Suai-Loro, ohin.
Oradór iha semináriu ne’e mak Diretora Servisu Saúde Covalima, Maria de Fátima Moniz, ne’ebé ko’alia sobre estratéjia no polílita Ministériu Saúde liuhusi Promosaun no Edukasaun Saúde ba intervensaun moras hada’et no lahada’et. Diretor-Ezekutivu Ospitál Referál Suai , Jeraldo Cardoso, ko’alia kona-ba dezafiu ba diagnóstiku no tratamentu iha moras da’et no lahada’et.
Aleinde ne’e, Dekanu Fakuldade Saúde Públika no Siénsia Médika, Cipriano do Rosário Paicheco, ko’alia sobre omportáncia husi melloramentu estadu nutrisaun ba moris saudavel.
Diretora Servisu Saúde Covalima, Maria de Fátima Moniz, hatete nia fahe informasaun sobre polítika Ministériu Saúde nian oinsá atu halo prevensaun no tratamentu ba moras hada’et hanesan VIH/Sida, Tuberkuloze, Malária, Dengue no moras lahada’et mak hanesan sofre kurasaun, stroke, diabetes no seluk tan.
Semináriu ne’e partisipa husi estudante Ensinu Sekundáriu Jerál Zumalai, Eskola Sekundária Jerál Suai, Eskola Tekniku Vokasionál, Eskola Sekundária Kátolika Ave Maria Suai no estudante estajiáriu UNPAZ.
Jornalista: Celestina Teles
Editora: Maria Auxiliadora
