iklan

HEADLINE, KAPITÁL

Família sentre triste lakon Ministru Amândio Benevides

Família sentre triste lakon Ministru Amândio Benevides

Ministru Justisa, Amândio de Sá Benevides. Imajen Tatoli/Francisco Sony

DILI, 20 janeiru 2024 (TATOLI)Família sente triste tanba lakon ema ne’ebé sira hadomi hanesan Ministru Justisa, Amândio de Sá Benevides, ne’ebé hakotu iis derrepente tanba moras fuan (kardiovaskulár).

“Ami sente lakon tebes ho ami-nia aman ne’ebé ohin mate derrepente, ida-ne’e halo ami família sente triste tebes,” Reprezentante família, Rui Fátima, hateten, ba jornalista sira iha rezidénsia Ministru Amândio, Malinamuk, sábadu ne’e.

Nia haktuir, molok atu bá Aeroportu Comoro hodi simu Primeiru-Ministru, Kay Rala Xanana Gusmão, ne’ebé foin fila hafoin vizita traballu iha Suiça, Ministru sei sai ho nia oan ida ki’ik bá hola brinkerus no fila hosi ne’ebá mak Ministru foin arranka bá iha Aeroportu.

“Hanesan Ministru, buat serbisu nasaun ne’e nia tau prioridade no nia mós durante ne’e hanesan aman di’ak ida bá família,” nia akresenta.

Notísia relevante : Ministru Justisa Amândio hakotu iis

Rui dehan, Ministru nia kondisaun saúde di’ak hela no laiha buat ruma.

“Durante ne’e, kuandu iha uma sente la okupadu, entaun Ministru deskansa no halo jinástika, durante ne’e laiha buat ruma, maibé derrepente ohin ami rona katak nia hakotu iis, hanesan família ami lakon aman di’ak ida,” nia triste.

Maski nune’e, família seidauk iha desizaun ruma kona-ba serimónia fúnebre, nune’e família sei tuur hamutuk hodi deside atu haloot iha munisípiu orijen (Aileu) ka iha Dili.

Iha fatin hanesan, Ministru Juventude Desportu, Arte no Kultura, Nélio Isaac Sarmento, sente lakon kolega di’ak ida.

“Hanesan membru Governu, ami triste tanba lakon ema di’ak, amigu no kolega di’ak, maibé ida-ne’e mak destinu Maromak nian. Ami hato’o sentidu kondolénsia triste ba família no husu família atu forte nafatin simu realidade ne’ebé Maromak fó mai,” nia hato’o.

Governante ne’e dehan, Ministru Amândio hanesan ema ne’ebé serbisu maka’as no tau importánsia ba nia serbisu, maski iha ezijénsia oioin, maibé nia serbisu nonok ho ninia estratejia rasik atu rezolve.

“Señor Amândio, nia ema ida ladún gosta ko’alia barak, nia gosta hatudu de’it nia serbisu, ita-boot sira hatene, nia Ministériu ne’e problema barak hanesan pasaporte, nia tenta ho nia kapasidade rasik no pensamentu ne’ebé iha hodi ajuda rezolve kestaun ne’e. Hanesan kompañeiru iha Partidu CNRT, nia hanesan ema ne’ebé serbisu nonok no lakohi ko’alia barak, nia konstribuisaun ba partidu konta mós tanba halo ona buat lubuk hodi ajuda dezenvolve partidu,” governante ne’e deskreve.

Tuir observasaun jornalista Agência Tatoli iha terrenu, nota katak membru IX Governu inklui entidade oioin, kolega no família, presta hela omenajen ba matebian Ministru Amândio iha rezidénsia Malinamuk.

Ministru Amândio moris iha suku Horai Ki’ik, postu administativu Maubisse, munisípiu Ainaro, iha loron 16 jullu 1964. Matebian hanesan oan datoluk hosi maun alin na’in-hitu, oan hosi Matias Doutel Sarmento de Sá Benevides no Rosa Sarmento Benevides. Nia kaben, Lídia de Araújo ho oan na’in-haat.

Amândio de Sá Benevides hetan nomeasaun no pose hosi Prezidente Repúblika José Ramos-Horta hodi envolve iha estrutura IX Governu Konstitusionál iha 01 jullu 2023, nu’udar Ministru Justisa.

Jornalista     : Natalino Costa

Editora          : Julia Chatarina

iklan
iklan

Leave a Reply

iklan
error: Content is protected !!