DILI, 20 janeiru 2024 (TATOLI)—Ministru Justisa, Amândio de Sá Benevides, sábadu ne’e, hakotu ona iis iha Hospital Nasional Guido Valadares (HNGV), hafoin hetan atakasaun derrepente iha Aeroportu Internasionál Prezidente Nicolau Lobato, Comoro.
Ministru Amândio hetan atakasaun bainhira hamutuk ho membru Governu seluk simu Primeiru-Ministru (PM), Kay Rala Xanana Gusmão, ne’ebé fila hikas hosi Suiça, hafoin halo vizita traballu.
Governante ne‘e desde iha pista aeroportu, hahú sente moras ona iha nia isin loron, nune’e nia kontaktu eskolta sira, bainhira lori ba sala VIP aeroportu laran hodi konversa ho PM Xanana, la kleur de’it hetan atakasaun no monu ba rai, hafoin ne’e nia hakilar maka’as.
Ho situasaun ne’e, halo membru Governu, PM Xanana inklui Prezidente Repúblika, José Ramos-Horta, ne’ebé akompaña hakfodak tanba Ministru Amândio la book-an ona.
Notísia relevante : PN apresia no sujere MJ mellora atendimentu trata pasaporte
Nune’e Ambulánsia mai foti kedan membru Governu ne’e hodi transporta bá HNGV hodi hetan tratamentu, maibé esforsu hirak ne’e laiha rezultadu tanba Ministru Amândio hakotu ona iis. Daudaun ne’e, mate-isin iha ona mortuáriu HNGV.
Xefe Gabinete Ministériu Justisa, Albertina da Cruz Santa, informa, hafoin Ministru hetan atakasaun hosi aeroportu, transporta kedas bá Ospitál Nasionál maibé la konsege salva nia vida.
“Nia hatun hosi Ambulánsia, lori tama bá Exelensia laiha ona iis,” Albertina informa ba jornalista sira, iha sala mortuáriu HNGV.
Iha fatin hanesan, Xefe Departementu Emerjénsia HNGV, Eldegar Lopes, hateten, Ministru Amândio tama sala emerjénsia iha tuku 12:54, tanba hetan atakasaun fuan (kardiovaskulár).
“Ohin mate tiha ona iha dalan mak to’o iha emerjénsia iis laiha ona, maibé doutór sira koko bomba nia fuan hodi hetan fali iis, maibé la konsege,” nia tenik.
Jornalista : Natalino Costa
Editora : Julia Chatarina
