VIQUEQUE, 20 janeiru 2024 (TATOLI)—Ministériu Agikultura Pekuária, Peska no Floresta (MAPPF) daudaun ne’e destaka ona ekipamentu pezadu hodi hamoos aii sira iha natar Daradau ektare 120, iha suku Vessoru, postu Uatulari, munisípiu Viqueque.
“Progresu daudaun ne’e ai sira hun hasai ona, maibé ekipamentu ida de’it, ne’ebé serbisu tarde liu,” Diretór Servisu Agrikultura Viqueque, Joaquim Fernandes, informa ba Agência Tatoli, iha postu Viqueque Vila, sábadu ne’e.
Notísia relevante : Irrigasaun Daradau iha suku Vessoru Viqueque funsiona ona ba natar ektare 340
Ministériu nia ekipamentu limitadu, tanba ne’e serbisu limpeza la’o demora, nune’e Servisu Agrikultura Viqueuqe sei koordena ho nasionál hodi apoia ekipamentu aselera serbisu.
Irrigasaun Daradau funsiona ba natar ektare 460, ne’ebé iha tinan 2023 agrikultór funsiona ona natar ektare 340, enkuantu ektare 120 abandona tanba ai moris nakonu iha natar laran.
“Tanba ne’e, presiza mákina pezadu hodi hamoos ai-horis sira hodi agrikultór sira bele halai natar ba époka 2024,” nia akresenta.
Bainhira konsege hamoos ai sira iha natar Daradau, iha époka 2024 bele hasa’e produsaun tanba natar ne’e iha área potensiál boot ba hare, tanba ne’e Servisu Agrikultura Viqueque sei esforsu hodi halo limpeza ai.
Suku Vessoru kompostu hosi aldeia hitu hanesan Balabasiba, Mau-Boru, Culu-Dere, Baha-o, Uani-Uma, Baha-Buga no Matau ho totál populasaun 1.519, mane 785 no feto 734 (sensu tinan 2015).
Jornalista : Vitorino Lopes da Costa
Editora : Julia Chatarina
