iklan

HEADLINE, KAPITÁL

PM Xanana sente triste tanba lakon membru Governu potensiál ida

PM Xanana sente triste tanba lakon membru Governu potensiál ida

Ministru Justisa, Amândio de Sá Benevídes, kaer liman ho Primeiru-Ministru, Kay Rala Xanana Gusmão, iha Aeroportu Comoro, ne’ebé foin hala’o vizita traballu iha Suiça, sábadu (20/01/2024). Imajen/Mídia GPM

DILI, 20 janeiru 2024 (TATOLI)Primeiru-Ministru (PM), Kay Rala Xanana Gusmão, sente triste tanba lakon Amândio de Sá Benevídes, nu’udar ema potensiál ida iha estrutura IX Governu Konstitusionál, ne’ebé asume kargu importante nu’udár Ministru Justisa.

“Triste tebes tanba ha’u asiste, bainhira tun hosi aviaun, ha’u sei konversa hela ho sira hotu, ha’u ko’alia mós ho Ministru Amândio. Ha’u husu sira hotu nia kondisaun, ami na’in-rua sei hamnasa hela, kaer liman, ami la’o hamutuk tama sala VIP, derrepente hetan atakasaun. Ami hotu preokupadu,” Xanana Gusmão hateten bainhira akompaña direta matebian iha Nacional Guido Valadares (HNGV), sábadu ne’e.

Notísia relevante : Ministru Justisa Amândio hakotu iis

Xefe Governu sente lakon tanba Ministru Amândio halo serbisu todan boot ida, hamutuk ho ekipa téknika sira hodi konsege rezolve problema kaderneta pasaporte iha fulan hirak nia laran, ne’ebé la’ós serbisu fásil.

Molok Ministru Justisa hakotu iis, iha dadeer nia  hamutuk ho membru Governu sira seluk hein iha Aeroportu Internasionál Prezidente Nicolau Lobato, hodi simu Xefe Governu ne’ebé foin fila hosi Davos, Suiça. Bainhira Xefe Governu tun hosi aviaun, Ministru Amândio hamutuk ho membru Governu sira akompaña direta bá iha sala VIP.

Iha konversa, Ministru Amândio hahú sente la konfortável tanba oin nakukun no kosar mak’as to’o monu.

Nue’e, membru Governu no seguransa sira konsege fó asisténsia hodi hatuur hikas no hatoba iha sofa leten, nune’e Xefe Governu orienta Vise-Ministru ba Operasionál Ospitál,  Flávio Brandão Mendes de Araújo, kontaktu ambulánsia no konsege transporta kedan bá HNGV hodi hetan asisténsia médika.

Iha oras hanesan, Primeiru-Ministru despede Prezidente Repúblika, José Ramos-Horta ne’ebé hala’o viajen Estadu bá Vaticano-Roma no kontinua tuir kedan Ministru Amândio bá HNGV maibé médiku sira la konsege salva nia vida.

Jornalista    : Natalino Costa

Editora         : Julia Chatarina

iklan
iklan

Leave a Reply

iklan
error: Content is protected !!