VIQUEQUE, 20 janeiru 2024 (TATOLI)—Servisu Agrikultura munisípiu Viqueque, liuhosi Diresaun Reprezentante Territoriál Floresta (RTF) kontinua sensibiliza abitante atu kuda ai ne’ebé iha valór ekonómiku hanesan ai-kameli.
“Ami durante ne’e halo ona sensibilizasaun ba abitante sira hodi kuda ai sira-ne’ebé iha valór ekonómiku hanesan ai-kameli. Ami fó hatene hodi abitante sira bele kompreende no kuda ai-kameli iha ida-idak ninia kintál,” Xefe Departamentu Reprezentante Territoriál Servisu Agrikultura munisípiu Viqueque, José da Silva, hateten ba Agência Tatoli, iha ninia knaar fatin, Beloi, sábadu ne’e.
Nia dehan, ai-kameli iha futuru sei fó reseita barak ba Estadu, tanba ne’e, ba oin sei esforsu halo sensibilizasaun no prodús viveiru ai-kameli hodi fahe ba abitante sira hodi kuda, nune’e ai-kameli labele lakon iha Timor.
Notísia relevante : MAP Viqueque planeia konserva no promove ai-kameli
Servisu Agrikultura munisípiu Viqueque kada tinan sempre prepara viveru ai-kameli no ai sira seluk hodi distribui ba abitante sira. Ekipa prepara ai-oan, hafoin abitante sira mai direta foti iha Sentru Agrikultura Raitahu, hafoin sira kuda iha to’os no kintál.
“Ami mós hanoin atu distribui direta ai-oan ba abitante sira, maibé difikuldade maka transporte laiha. Nune’e, ami halo sensibilizasaun hodi fó hatene ba sira-ne’ebé hakarak kuda ai-oan, bele bá direta iha Sentru Raitahu, lori kartaun eleitorál no pedidu ida maka ami fahe ai-oan,” nia hato’o.
Kritéria foti ai-oan maka abitante sira tenke kria lutu di’ak atu animál sira labele estraga ai-oan tanba presiza asegura bainhira foti ona ai-oan ho gratuita.
Servisu Agrikultura Viqueque iha tinan 2023 nia laran, konsege prodús ona viveiru ai-kameli no ai sira seluk hamutuk 80.000. Iha tinan 2024, sei prepara tan viveiru ai-kameli inklui ai sira seluk hamutuk 20.000 iha Sentru Agrikultura Raitahu.
Jornalista : Vitorino Lopes da Costa
Editora : Julia Chatarina
