iklan

HEADLINE, INKLUZAUN SOSIÁL

AHDMTL halo abertura formasaun letra braille ba ema ho defisiénsia matan

AHDMTL halo abertura formasaun letra braille ba ema ho defisiénsia matan

Diretór Ezekutivu AHDMTL, Gabriel Ponciano de Sousa. Imajen Tatoli/Francisco Sony

DILI, 22 janeiru 2024 (TATOLI)—Asosiasaun Halibur Difisiénsia Matan Timor-Leste (AHDMTL), segunda ne’e, halo abertura formasaun letra braille ba ema defisiénsia matan sira.

Diretór Ezekutivu AHDMTL, Gabriel Ponciano de Sousa, konsidera, formasaun ne’e importante tebes tanba bele fasilita partisipante sira asesu ba edukasaun formál.

“Liuhosi formasaun ne’e mak fó kadernizasaun ba ita-nia maluk defisiénsia matan sira hodi asesu ba edukasaun formál,” Diretór Ezekutivu asosiasaun, hateten, iha edifísiu AHDMTL, Manleuana, segunda ne’e.

Notísia relevante : AHDMTL husu Governu labele hapara Programa Bolsa da Mãe Jerasaun Foun

Aleinde ne’e, halo mós abertura formasaun seluk hodi ema ho defisiénsia matan no difisiénsia sira seluk bele apreende hanesan komputadór, inglés no mobilidade.

Formasaun ne’ebé ohin halo abertura ne’e ho durasaun tinan-ida tomak, hahú ohin no sei ramata iha dezembru 2024. Formadór sira ne’ebé hanorin ne’e mai hosi membru AHDTL rasik.

“Kada tinan, tuir ita-nia planu loke formasaun ne’e tenke iha formandu 40 mai hosi munisípiu hotu, maibé daudaun ne’e foin ema 20 resin, ita espera maluk defisiénsia matan no defisiénsia sira seluk ne’ebé seidauk hetan oportunidade bele mai asesu hotu,” nia akresenta.

Tinan ne’e sei rejista tan ema ho defisiénsia matan na’in-tolu atu asesu ba edukasaun iha Universidade Nasionál Timor-Lorosa’e.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!