OÉ-CUSSE, 14 dezembru 2023 (TATOLI – Asosiasaun Halibur Defisiénsia Matan Timor-Leste (AHDMTL), hamutuk ho Provedoria Direitu Umanu no Justisa (PDHJ), husu IX Governu Konstitusionál liuhosi Ministériu Solidariedade Sosiál no Inkluzaun (MSSI) atu kontinua Programa Bolsa da Mãe Jerasaun Foun.
Notísia relevante: Governu sei selu benefisiáriu Bolsa da Mãe Jerasaun Foun 61.293
Diretór Ezekutivu AHDMTL, Gabriel Ponciano de Sousa, konsidera Programa Bolsa da Mãe Jerasaun Foun ne’e fó benefísiu ba labarik no labarik defisiénsia sira, inklui inan isin-rua atu hakmaan nesesidade família.
“Maibé saida mak ita haree no rona, agora Governu deside hapara, maibé la ho razaun ida forte ba komunidade sira, tán ne’e ita konsidera hanesan violasaun direitu ba ema hotu, sira deside hapara, sira ignora jerasaun futuru nian, tán ne’e ita kontinua husu atu kontinua programa ne’e,” Gabriel Ponciano de Sousa, ko’alia iha Oé-Cusse,.
Tuir nia, tanba Programa Bolsa da Mãe Jerasaun Foun fó benefisiu ba labarik ki’ik inklui defisiénsia sira, hapara Bolsa da Mãe Jerasaun Foun ba inan isin-rua sira, ida-ne’e ignora jerasaun ba rai ida-ne’e nian.
“Tán ne’e maka ita ejize ba direitu ida-ne’e, liuliu iha Konstituisaun RDTL iha artigu 21 prevista kona-bá direitu ba sidadaun ho defisiénsia sira fortifika liután ho artigu 16 kona-bá prinsípiu direitu umanu nian,” nia rekomenda.
Prezidente Autoridade sesante, Arsénio Paixão Bano, reforsa, Programa Bolsa da Mãe Jerasaun Foun, loloos Governu presiza haree ninia vantajen tanba alvu direita ba labarik no defisiénsia sira inklui inan isin-rua.
“Programa ne’e ita mós komunika ba Governu Sentrál, foin daudaun Ministra Solidariedade Sosiál mai mós ita ko’alia, katak Programa Bolsa da Mãe Jerasaun Foun, sei bele lalika hapara, tanba ne’e apoia ba inan isin-rua sira, bolsa ba oan sira atu hadi’a jerasaun ba futuru, liuliu bolsa ne’e labele hapara ba labarik sira ho defisiénsia,” nia katak.
Nia hatutan, tanba liuhosi Programa Bolsa da Mãe Jerasaun Foun ne’e bele tulun inan-aman sira atu hakmaan susar iha uma laran.
“Maibé ita labele lakon vontade ita ko’alia nafatin ho Governu Sentrál liuhosi MSSI tanba ne’e importante ba jerasaun futuru.”
Notísia relevante: MSSI: Programa foun sei substitui Bolsa da Mãe Jerasaun Foun
Jornalista: Abílio Elo Nini
Editór: Evaristo Soares Martins
