DILI, 12 dezembru 2023 (TATOLI)–Ministra Solidariedade Sosiál no Inkluzaun (MSSI), Verónica das Dores, hateten programa foun sei substitui programa Bolsa da Mãe Jerasaun Foun (BdMJF) maibé la’ós ho osan.
Notísia Relevante: FOKUPERS husu MSSI justifika revoga lei kria “Bolsa da Mãe Jerasaun Foun”
“Bolsa da mãe jerasaun foun ramata maibé Governu kontinua ho bolsa da mãe kondisionál no ita iha programa seluk ne’ebé sei substitui bolsa da mãe jerasaun foun maibé la’ós ho osan. Ita sei kria programa ne’ebé sustentável nune’e tinan rua-tolu mai, ita-nia osan labele hotu lalais tanba ita-nia mina-rai atu besik maran ona,” Ministra Veronica hateten ba jornalista sira, bainhira partisipa iha aprezentasaun lei Orsamentu Jerál Estadu (OJE) 2024 ba membru Parlamentu Nasionál, tersa ne’e.
Tanba ne’e, presiza halo lai estudu ida ba programa ne’e no programa ne’e nia redús duni má nutrisaun ka hamenus duni kiak no probreza iha rai-laran.
“Se ita fó osan, inan sira sosa aihan fó han bebé iha kabun laran ne’e ka lae, keta ba hola fali obralan ka halimar bingo. Entaun, programa ne’ebé substitui ne’e ita hakarak fó diretamente aihan ba inan sira han, nune’e fó isin di’ak ba oan iha kabun laran. Entaun, ita tenke halo análiza ida kle’an nune’e iha nia sustentabilidade. Tanba to’o agora seidauk iha estudu ida kle’an kona-ba ema ne’ebé hetan subsídiu hosi programa ne’e hetan nutrisaun di’ak,” nia dehan.
Tanba ne’e, Governu hakarak fó subsídiu liuhosi meiu ne’ebé di’ak, Governu sempre halo planu di’ak ba nia povu maibé labele liuhosi osan tenke liuhosi aihan.
“Agora lei ida ba bolsa da mãe jerasaun foun universál tebes, katak ema hotu-hotu hetan direitu ba subsídiu ne’e. Ministra isin-rua hetan subsídiu no deputadu nia oan mak isin-rua mós hetan, entaun ita hanoin labele, nune’e ita deside la’o lai ho bolsa da mãe kondisionál ne’e. Tanba, programa ne’e haree ba ema vulnerável de’it,” nia esplika.
Programa ne’e, Govermu implementa ona iha Ainaro, Bobonaro no RAEOA iha tinan 2022 no iha Covalima, Liquiçá, Manatuto no Viqueque iha tinan 2023, no subsídiu kada fulan ba inan isin-rua $15, labarik tinan 0-3 no labarik ho moras króniku ka difisénsia ne’e hetan $20.
To’o loron 31 agostu 2023 liubá, benefisiáriu bolsa da mãe jerasaun foun hamutuk 53.512 mak rejistradu, ne’ebé kompostu hosi inan isin-rua ne’e iha 9.601, labarik na’in-43.413, labarik ho defisiensia na’in-198.
Hosi totál benefisiáriu ne’ebé rejistradu, Ministériu Solidaridade Sosiál no Inkluzaun (MSSI) aprova ona ema 51.326 ne’ebé kompostu hosi inan isin-rua hamutuk 9.037, labarik iha na’in-42.104 no labarik ho defisiensia hamutk na’in-185.
Notísia Relevante: Governu revoga programa bolsa da mãe jerasaun foun
Jornalista : Osória Marques
Editór : Cancio Ximenes
