DILI, 22 janeiru 2024 (TATOLI) – Uma 49 mak hetan estragu no ema na’in-haat lakon sira-nia vida, rejista dadus husi Autoridade Protesaun Sivíl (APC, sigla portugés).
Xefe Gabinete Relasaun Esterna no Komunikasaun (GREC), Cesário Marques, relata dadús dezastre naturál ne’ebé rejista entre loron 09 no 15 janeiru ne’e, uma 49 mak hetan estragu, kompostu husi anin sobu uma hamutuk 36, ahi han uma ualu no impaktu husi rai-halai iha uma lima. Aleinde ne’e, rejista ema na’in-haat mak lakon vida – ida mai husi Viqueque no tolu husi Liquiçá.
“Dadús sira ne’ebé rejista ne’e mai husi munisípiu ualu ne’ebé afetadu ba dezastre naturál, kompostu husi Aileu anin sobu uma rua, Baucau uma lima, inklui ahi han uma tolu, Bobonaro anin sobu uma ida no ahi han rua, rai halai estraga uma tolu. Covalima anin sobu uma sia, ahi han uma tolu, Ermera anin sobu uma sia, rai halai estraga uma rua, Liquiçá anin sobu uma tolu, RAEOA anin sobu uma ida no Viqueque anin sobu uma tolu”, dehan liuhusi konferénsia imprensa, iha Caicoli, ohin.
Dezastre naturál ne’ebé akontese iha munisípiu ualu ne’e, Komandu APC munisípiu ho parseiru sira fó ona apoiu emerjénsia ba família afetada sira hanesan ai-han no la’ós ai-han. Ekipa servisu APC sira iha munisípiu ualu refere daudaun halo hela serbisu rekolla dadus ba uma-kain 49 nian, nune’e bele relata ba nasionál hodi bele tama iha konsiderasaun.
“Apoiu emrejensia ne’ebé maka ita haruka ona bá maka foos, supermie, mina, masin inklui sanan no taxu ne’ebé ita kategoriza ba emerjénsia atu sira uza. Ita-nian ekipa sira kontinua halo serbisu foti dadus kada uma-kain, nune’e ita bele identifika ho loloos tipu dezatre ne’ebé afeta ba família 49 ne’e”, realsa.
Rekorde katak APC rejista, entre loron 09 no 15 janeiru, uma-kain 432 mak afeta inundasaun, ema na’in-ualu kanek no mate ida.
Notísia relevante: APC rejista uma-kain 432 afetadu ba inundasaun no na’in-ualu kanek
Jornalista: Tomé Amado
Editora: Maria Auxiliadora
