PN husu MSSI hamatan ba labarik faan sasán iha dalan ninin
DILI, 22 janeiru 2024 (TATOLI)—Sekretária Meza Parlamentu Nasionál (PN), Deputada Virgina Ana Belo, husu ba Ministériu Solidariedade Sosiál no Inkluizaun Sosiál (MSSI) atu tau atensaun ka hamatan ba labarik sira ne’ebé kontinua faan sasán iha dalan ninin.
Notísia Relevante: PN aprova projetu-lei indultu iha finál globál ho votu a-favór 36
“Ha’u hakarak atu ko’alia asuntu kona-ba labarik sira nafatin kontinua faan sasán iha dalan ninin ka loza sira. Hanoin tempu naruk, ita hotu preokupasaun ida-ne’e, ita espera katak bele rezolve situasaun ida-ne’e, tanba labarik sira, liliu labarik feto sira iha perígu nia laran kuandu sira faan sasán iha tempu kalan, ita lahatene saida mak bele akontese ba alin sira ne’e, ema ida mai nia ho kareta nia bele bosok tiha labarik feto ne’e, ita bele imajina saida mak akontese,” nia hateten liuhosi intervensaun iha reuniaun plenária PN, segunda ne’e.
Tanba ne’e, nia husu ba Prezidente Institutu Nasionál Defeza Direitu ba Labarik (INDDICA, sigla portugés) no Ministériu Solidariedade Sosiál no Inkluzaun (MSSI) atu tau atensaun ba situasaun ne’e no serbisu hamutuk ho PNTL atu organiza didi’ak ho labarik sira-ne’e.
Liuhosi sesaun plenária ne’e, Vise Ministru ba asuntu Parlamentár, Adértio Hugo da Costa, la hatán prekupasaun ne’e maibé rejista no sei hato’o ba ministériu tutela tau atensaun ba ida-ne’e.
Notísia Relevante: “Hahú agora proteje-promove labarik sei hetan fini di’ak iha futuru”
Jornalista : Nelson de Sousa
Editór : Cancio Ximenes
