iklan

NASIONÁL, EKONOMIA, HEADLINE

SERVE, I.P kontinua fó atendimentu públiku ho funsionáriu 64

SERVE, I.P kontinua fó atendimentu públiku ho funsionáriu 64

Diretór Ezekutivu SERVE, I.P, Florêncio Sanches. Imajen Tatoli/Jogerjo Guterres

DILI, 22 janeiru 2024 (TATOLI)Servisu Rejistrasaun no Verifikasaun Emprezariál, Institutu Públiku (SERVE, I.P) daudaun ne’e mantein ho funsionáriu 64 hodi fó atendimentu ba públiku trata dokumentu ba negósiu.

“To’o agora ha’u seidauk hetan informasaun ruma hosi Gabinete Vise Primeiru-Ministru, bainhira mak hasai fali desizaun ida hodi halo rekrutamentu foun ka oinsá, konserteza rekrutamentu foun ne’ebé bainhira loke fali rekrutamentu sira, hirak ne’ebé hapara bele konkorre, maibé ida-ne’e desizaun superiór nian, ha’u hein de’it,” Diretór Ezekutivu SERVE, I.P, Florêncio Sanches, hateten ba Agência Tatoli, iha ninia knaar fatin, Palm Busines Center, Hudi-laran, segunda ne’e.

Notísia relevante : Menus espasu, SERVE, I.P fó limitasaun ba atendimentu públiku

Jerente institutu konsidera, relevante tebes atu halo rekrutamentu tanba ho desizaun hapara funsionáriu, entaun limitadu tebes no presiza rekursu halo serbisu, enkuantu SERVE, I.P ninia funsionáriu tenke koloka iha munisípiu.

Despaixu ne’ebé fó sai hosi Vise Primeiru-Ministru, Ministru Koordenadór Asuntu Ekonómiku, no Ministru Turizmu no Ambiente, Francisco Kalbuadi Lay, katak funsionáriu kontratadu termu sertu termina iha loron 31 dezembru 2023.

“Ne’ebé, SERVE, I.P ninia funsionáriu hamutuk 230 iha territóriu Timor, maibé funsionáriu sira ne’e balun kontratu termina iha tinan 2025, maibé desizaun ne’e tenke termina hotu, tanba ne’e maka ha’u kumpre desizaun ne’e hodi hapara kontratu funsionáriu sira. Maski Ministru haruka hapara, maibé ha’u hatene katak ministru la’ós atu taka instituisaun, entaun funsionáriu 230 ne’e para hotu sé mak serbisu? Entaun, ha’u defende interrese Estadu ha’u bolu Xefe Departamentu hodi hili ema ida kada diresaun para aguenta serbisu hodi fó atendimentu ba públiku tanba Ministru haruka hapara de’it mak ema la’ós taka instituisaun,” nia argumenta.

Nune’e, Diretór Ezekutivu SERVE la hapara hotu, maibé hapara de’it 70% hosi totál funsionáriu, katak na’in-166 mak hapara maibé mantein 64, signifika katak 30% mak serbisu hela iha instituisaun Estadu ne’e.

“Arquivista ha’u labele hapara tanba sira-nia papel importante tebes, tanba ha’u simu pedidu lubuk ida hosi Ministériu Públiku, Polísia Servisu Sientífiku Investigasaun Kriminál (PSIK), Provedoria Direitu Umanu no Justisa (PDHJ), no Tribunál, ligadu ho prosesu balun, bainhira ha’u hapara hotu sira, dadus sira ne’e sé mak atu fornese, tanba dadus sira ne’e iha territóriu tomak, karta hosi instutuisaun sira ne’e fó prazu loron-lima,” nia preokupa.

Antes ne’e, kada loron atende ema na’in-50, maibé daudaun ho limitasaun rekursu, kada loron atende ema na’in-lima de’it.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!