iklan

COVALIMA, HEADLINE

Autoridade postu no xefe suku sira partisipa iha sensibilizasaun matadalan PNDS

Autoridade postu no xefe suku sira partisipa iha sensibilizasaun matadalan PNDS

Autoridade postu no xefe suku sira partisipa sensibilizasaun matadalan PNDS.

COVALIMA, 23 janeiru 2024 (TATOLI) – Autoridade postu administrativu no xefe suku sira iha Covalima partisipa iha atividade sensibilizasaun kona-ba matadalan implementasaun Programa Nasionál Dezenvolvimentu Suku (PNDS) siklu neen tinan 2024 nian.

Sensibilizasaun matadalan PNDS aprezenta sobre matéria sira hanesan saida mak PNDS, objetivu no prinsípiu xave PNDS, enkuadramentu legál, jestaun finanseira no alokasaun orsamentu PNDS 2024.

Aleinde ne’e, aprezenta menú indikativu PNDS, atividade manutensaun PNDS, projetu konjuntu entre suku, hapara no hamenus subsídiu suku, siklu implementasaun ba aprovosaun proposta komunidade no autór implementasaun PNDS.

Matéria hirak ne’e aprezenta husi reprezentante Sekretáriu Nasionál PNDS, Rogério Mucandala no tékniku Vladimir Benevides no Maria Luiza Belo Magno.

“Ita halo sensibilizaun matadalan PNDS nivél munisipál atu hatene implementasaun hodi haree mós knaar prezidente autoridade, administradór postu, xefe suku sira no kria ona ekipa jestaun suku no knaar fasilitadór iha postu administrativo sira”, Rogério Mucandala dehan iha salaun administrasaun postu suai, Tabakolot, ohin.

Governu presiza sensibiliza matadalan implementasaun PNDS ba xefe suku sira, tanba balun foin eleitu, nune’e-sira bele iha koñesimentu kona-ba programa ne’ebé hahú implementa iha 2013 to’o ohin loron.

Reprezentante Administradór munisípiu Covalima, Miguel Armada, husu ba autoridade postu no xefe suku sira atensaun ba informasaun kona-ba matadalan implementasaun PNDS.

“Bazeia ba lei númeru 9/2016 kona-ba kompeténsia xefe suku, implementasaun Programa PNDS hanesan atu suru rai-henek bele halo kobransa, maibé desizaun tenke konsensu ho konselu suku”, afirma.

Xefe Suku Debos, Agustinho da Silva, hateten hanesan lidér suku presiza atu rona informasaun kona-ba  matadalan implementasaun  programa PNDS.

“Kona-ba implementasaun matadalan ba ami la problema. Durante ne’e ami kumpre  hela matadalan no nia implemenatasaun laiha mudansa”, asegura.

Programa sensibilizasaun ne’e partisipa husi administradór postu-sira, xefe suku 30, funsionáriu PNDS munisípiu no tékniku PNDS, ofisiál finansa no ofisiál sosiál husi postu administrativu hitu.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!