iklan

NASIONÁL, DILI, HEADLINE, SOSIEDADE SIVĺL

Don Virgílio Kardeál husu MS rezolve problema hapara profisionál saúde

Don Virgílio Kardeál husu MS rezolve problema hapara profisionál saúde

Arsebispu Arkidioseze Metropolitana Díli, Dom Vírgilio Kardeál do Carmo da Silva, SDB. Imajen/Tatoli

DILI, 23 janeiru 2024 (TATOLI)–Arsebispu Arkidioseze Metropolitana Díli, Dom Vírgilio Kardeál do Carmo da Silva, SDB, husu ba Ministra Saúde atu rezolve problema aimoruk stock out no hapara profisionál saúde sira-nia kontratu atu labele fó impaktu ba atendimentu ba populasaun.

Notísia Relevante: Profisionál Saúde rekrutadu 229 hahú servisu aban iha HNGV

“Primeiru saúde ne’e esensial tebe-tebes. Ho lamentasaun no halerik ne’ebé ita rona kona-ba sistema saúde iha ita-nia rai laran liuliu liga fasilidade saúde nian no aimoruk ne’e kompetensia Governu nian. Husu ba ministériu kompetente atu tau atensaun ba iha saúde,” Don Virgílio Kardeál hateten ba Agência Tatoli iha nia kna’ar fatin episkopal, Lecidere, segunda ne’e.

Iha époka udan ida-ne’e, tempu ida-ne’ebé moras hahú mosu oioin ne’ebé ema barak mak hetan moras no ema barak presiza aimorok, entaun ministériu kompetente tenke rona povu nia halerik kona-ba aimoruk stock out no menus pesoál saúde atu atende pasienta sira.

Ema sira-ne’ebé hela iha foho la asesu ba mídia no la ko’alia sai buat ida no ema rona sira-nia lian halerik, no sira ne’e terus nonok no mate nonok tanba de’it laiha meiu ida.

Iha momentu ida-ne’e, Don Virgílio Kardeál, hateten ministériu saúde tenke haree ba asuntu importante ida-ne’e atu nune’e atendimentu públiku ne’e bele la’o ho di’ak.

“Ema kontinua halerik ba falta aimoruk iha sentru saúde no ospitál. La’os de’it iha kapital, ita iha kapital ita asesu ba mídia ema sei ko’alia. Maibé, sira-ne’ebé iha foho, iha área remota ho udan no estrada aat, no dala barak ita hare katak iha sentru saúde maibé doutor laiha, enfermeiru laiha no aimoruk mós laiha,” nia lamenta.

Edukasaun sai xave ba bem estar ema-nian

Entretantu, liga ba asuntu ida-ne’e, Arsebispu Arkidioseze Metropolitana Díli, Dom Vírgilio Kardeál do Carmo da Silva, hateten edukasaun sai xave ba dezenvolvimentu nasionál no bem estar ema-nian, nune’e tenke investe no tau importánsia ba iha setór saúde.

“Maioria populasaun rai ida-ne’e nian labarik no joven ne’e idade ida-ne’ebé tenke asesu ba edukasaun ne’ebé di’ak,” nia dehan.

Tuir nia, Ministériu Saúde tenke investe edukasaun ida kualifikadu ba ema hotu atu bele garante  edukasaun ida-ne’ebé di’ak hodi lori Timor-Leste ba prosperiedade.

“Ita hakarak atu lori dezenvolvimentu ne’ebé di’ak no lori dezenvolvimentu ne’e lori Timor ba prosperidade, dame no hakmatek. Ita presiza mos asegura edukasaun ida-ne’ebé di’ak iha ita-nia rain. Ha’u hanoin halerik oioin ne’ebé mosu ne’e sai nafatin oportunidade ida, bolu ida no konvite ida ba ministériu kompetente bele haree oinsa bele halo investimentu makaas liután no fó atensaun di’ak liután iha ita-nia rai-laran,” nia hateten.

Kona-ba kestaun Governu hapara profesór no profisionál saúde nia kontratu iha dezembru 2023, nia hatán, eskola sira-ne’ebé depende de’it ba iha profesór kontratadu no sentru saúde no ospitál ne’ebé depende de’it pesoal kontratadu, ida-ne’e afeta ba iha atendimentu pasiente no atividade prosesu ensinu aprendizajen iha sala-de-aula.

“Ministériu kompetente tenke asegura ema hotu nia direitu. Maske servisu boot ida maibé ne’e hanoin mós responsabiliade ida-ne’ebé ita-nia na’in-ulun sira tau iha konsiderasaun hodi rona mós povu sira-nia halerik, sosiedade ninia lian liuliu sira-ne’ebé ema la rona sira nia-lian,” nia dehan.

Don Vírgilio Kardeál hateten, Governu tenke haree ba iha rekezitu sira no nesesidade kada ministériu kona-ba rekrutamentu no kontratu ba profisionál sira ka mákina Estadu nian hodi labele afeta ba servisu sira no atendimentu públiku iha instituisaun sira.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!