COVALIMA, 23 janeiru 2024 (TATOLI) – Progresu konstrusaun Uma Naroman ba Povu (UNP) Plus A ho unidade 75 iha postu administrativu Maucatar, iha suku Belekasak, Matai, Ogues no Holpilat labele finaliza tuir kontratu ne’ebé iha.
Diretór Programa Nasionál Dezenvolvimentu Suku (PNDS) Covalima, Pedro de Araújo Gomes, hatete durasaun obra UNP Plus A ne’e fulan haat katak hahú iha marsu 2023 no dentru loron 120 loloos finaliza ona, maibé tanba iha implementasaun hasoru difikuldade balun hanesan empreza fornesedora ne’ebé distribui materiál konstrusaun ne’e Governu halo pagamentu tarde hodi fó impaktu ba progresu konstrusaun.
Nia klarifika katak pagamentu tarde tanba empreza sira submete invoice lahanesan ho pedidu husi tékniku PNDS no dadaun tempu halai natar, entaun badaen sira halo fali natar. Ho kestaun ne’e maka PNDS buka meiu hodi halo enkontru ho komunidade hodi troka fali badaen sira, nune’e bele finaliza lalais obra sira ne’e.
“UNP Plus A ne’ebé ita implementa iha postu administrativu Maucatar ho unidade 75 nia progresu implementasaun atinje ona 52%. Progresu konstrusaun fizíka iha terrenu foin taka zinku nune’e atu kontinua mak Governu seidauk halo pagamentu”, dehan responsavel ne’e.
PNDS munisípiu konfirma ona ho tékniku iha postu administrativo sira atu halo verfikasaun, nune’e hahú halo ona pagamentu tanba Sekretáriu Tékniku PNDS Nasionál fó deadline ba konstrusaun UNP to’o de’it fulan-marsu tenke finaliza.
Xefe Suku Belekasak, Leonito Gusmão, relata katak konstrusaun Uma Naroman ba Povuiha postu Maucatar ho unidade 75 ne’e – iha suku Belekasak hamutuk 19, Holpilat 19, Matai 19 no Ogues 18.
Tuir observasaun Leonito Gusmão, konstrusaun UNP iha suku Belekasak maioria taka ona zinku, emprea sira fornese materiál konstrusaun la tarde, maibé hasoru problema mak traballadór la ativu atu halo serbisu.
Implementasaun UNP Plus A ho unidade 75 ne’e konstrui ho nia orsamentu hamutuk rihun $965.
Jornalista: Celestina Teles
Editora: Maria Auxiliadora
