DILI, 23 janeiru 2024 (TATOLI)–Ministériu Finansa (MF) liuhosi Diresaun Jerál Tezouru, tersa ne’e, divulga dekretu-lei kona-ba ezekusaun Orsamentu Jerál Estadu (OJE) tinan 2024, ba klafisikasaun orsamentál no mapa konta kontabilidade 2024 ba ministériu no instituisaun Estadu hotu.
“Antes ne’e atribui ona envelope kona-ba orsamentu promulgadu ba instituisaun Estadu idaidak no munisípiu. Tinan 2024, tuir polítika IX nian, ami sei desentraliza hotu prosesu tomak ba ezekusaun orsamentu iha instituisaun ida-idak nian kompara ho antes instituisaun 27 ne’ebé ninia prosesu pagamentu sei sentraliza iha tezouru Ministériu Finansa nian, maibé tinan 2024 kompeténsia sira-ne’e desentraliza ona iha kada ministériu ida-idak,” Ministra Finansa, Santina José Rodrigues Viegas Cardoso hateten, bainhira halo abertura ba atividade divulgasaun, iha Ministériu Finansa, tersa ne’e.
Atividade divulgasaun informasaun sei hala’o durante loron-rua (tersa-kuarta), iha Auditóriu Ministériu Finansa, Aitarak-laran.
Notísia relevante : Konsellu Ministru aprova regra ezekusaun OJE 2024
Nia dehan, ho desentralizasaun ida-ne’e, papél responsável entidade sira nian mak atu asegura despeza públika atu gasta tuir regra, dalan no lei.
“Tanba ne’e, ezije ita hotu atubele iha koñesementu komesa hosi halo kompromisu, aprovizionamentu to’o iha prosesu pagamentu,” nia akresenta.
Nune’e, governante ne’e espera katak ho divulgasaun ne’e, responsável sira bele iha koñsementu kle’an kona-ba lei sira ne’ebé iha relasaun ho jestaun finansa públika, atu nune’e bele fasilita ezekuta orsamentu tuir lei no evita risku sira.
Iha biban hanesan, Diretora Jerál Tezouru, Regina de Jesus de Sousa, informa, atividade ne’e kada tinan realiza bainhira dekretu ezekusaun publika ona. Tanba divulgasaun ne’e importante ba entidade sira hodi nune’e bele ezekuta orsamentu Estadu ho di’ak, tuir regra no prosedimentu sira.
“Halo divulgasaun dekretu-lei kona-ba OJE 2024, tanba iha mudansa oitoan, katak iha 2023 ita iha kategoria 19, maibé polítika IX Governu nian muda ba kategoria 5, entaun iha mós mudansa kódigu orsamentu hotu, tanba ne’e maka loron-rua ne’e importante atu divulga ba servisu no entidade tomak atubele iha koñesementu kle’an, liu-liu kona-ba dekretu-lei ezekusaun orsamentu, atu nune’e iha dúvida ruma iha ámbitu ne’e oportunidade di’ak hodi husu kedas klarifikasaun, hodi ezekuta orsamentu ho di’ak to’o 31 dezembru 2024,” nia esplika.
Direjente ne’e dehan, ein termu ezekusaun laiha diferensa, tanba sistema nafatin, mudansa mak kategoria sira de’it, katak muda hosi kategoria 19 ba lima, hanesan kategoria saláriu no vensimentu, bens no servisu, kapitál minor, kapitál dezenvolvimentu no transferénsia públika. Diferensia oitoan tanba bainhira ita halo mudansa hosi kategoria sira ne’e automátikamente iha mós mudansa iha kódigu sira.
Jornalista : Antónia Gusmão
Editora : Julia Chatarina
