DILI, 24 janeiru 2024 (TATOLI)—Arkivu Nasionál Timor-Leste, Institutu Públiku (ANTL, I.P) halo ona kooperasaun ho Ajénsia Teknolojia Informasaun no Komunikasaun Timor, Institutu Públiku (TIC Timor, I.P) atu kria sistema arkivu hodi dijitaliza dokumentu istóriku sira.
“Ita koopera ona ho TIC Timor, katak tinan ne’e sei kria sistema arkivu hodi dijitaliza dokumentu istóriku sira ne’ebé ita rai, nia objetivu mak hakarak prezerva dokumentu sira hodi tau iha sistema ida, tanba daudaun ne’e dokumentu sira ne’ebé ita rai manuál de’it, buat ruma akontese ita labele salva,” Diretór Jerál ANTL, Fernando de Sousa, informa ba Agência Tatoli, iha ninia knaar fatin, Caicoli, kuarta ne’e.
Notísia relevante : ANTL presiza arkivista atu prezerva dokumentu istóriku
ANTL prevee osan ba tinan 2024 ne’e hamutuk $1.080.000, nune’e sei estabelese sistema arkivu iha tinan ne’e.
“Hosi orsamentu ne’e, ita-nia planu prioridade mak kria sistema arkivu, harii sala akollamentu provizóriu atu tau dokumentu no seluk tan,” nia akresenta.
Kustu ba sistema arkivu sei iha diskusaun nia laran, enkuantu harii sala akollamentu hamutuk $130.000.
Institutu Públiku ne’e daudaun hasoru dezafiu tanba seidauk iha lejizlasaun ruma atu haforsa atividade.
“Ita seidauk iha lei ne’ebé atu regula atividade sira, entaun ema mai vizita tama sai mós ita seidauk bele halo reseita tanba laiha lei ruma. Espera tinan ne’e Governu bele ajuda ami aprova ami-nia lei tanba esbosu lei iha ona, hein haree no aprova,” nia tenik.
Jornalista : Arminda Fonseca
Editora : Julia Chatarina
