Deputadu PD husu estabelese postu saúde permanente iha aeroportu Comoro
DILI, 24 janeiru 2024 (TATOLI)—Deputadu bankada PD iha Parlamentu Nasionál (PN), Armando Lopes, husu ba parte kompetente atu estabelese postu saúde permanente iha aeroportu Internasionál Nicolau Lobato, Comoro, Dili, nune’e bele destaka profisionál saúde halo atendimentu bainhira mosu kazu emerjénsia sira.
Notísia Relevante: Ministru Justisa Amândio hakotu iis
“Preventivu saúde ba umanu ne’e importante. Foin daudaun akontesimentu atakasaun ba ita-nia saudozu ka Ministru Justisa ne’e, PD sente ofendidu. Maibé, ida-ne’e hanesan lisaun ida ba Governu atu liuliu iha fatin hirak importante hanesan aeroportu nu’udar portaun ba ema iha rai-laran no vizitór sira hosi rai-li’ur tama-sai. Ita haree aeroportu internasionál hosi nasaun seluk, buat sira-ne’e estabelese kompletu. Ne’ebé, hanoin iha nesesidade duni ba Governu atu tau postu saúde iha aeroportu,” Deputadu PD ne’e hateten ba jornalista sira iha uma fukun PN, kuarta ne’e.
Tanba ne’e, Deputadu husi bankada Governu ne’e sujere ba parte ezekutivu liuhosi parte kompetente atu estabelese postu saúde permanente inklui destaka profisionál saúde permanente iha aeroportu internasionál Nicolau Lobato, hodi halo atendimentu ba kazu ema moras emerjénsia sira hodi fó primeiru sokoru.
Nia hateten, nu’udar Deputadu hosi Partidu Demokrátiku bainhira ko’alia kona-ba demokrásia sentru ne’e povu, nune’e ko’alia kona-ba saúde importante tanba ne’e atendimentu sira hanesan ne’e importante tebes.
Jornalista : Nelson de Sousa
Editór : Cancio Ximenes
