DILI, 24 janeiru 2024 (TATOLI)—Ekipa hosi Konsellu Kombatente Libertasaun Nasionál (CCLN, sigla portugés), kuarta ne’e, hasoru malu ho Primeiru-Ministru (PM), Kay Rala Xanana Gusmão, hodi aprezenta asuntu rua.
“Ohin ami hasoru malu ho ita-nia Primeiru-Ministru Xanana hodi aprezenta asuntu rua kona-ba preparasaun loron veteranu ne’ebé sei monu iha loron 03 marsu no fundu investimentu, katak fundu ne’ebé rekolla hosi fundu kontributivu kombatente libertasaun nasionál,” Prezidente CCLN, Vidal de Jesus ‘Riak Leman’, informa ba Agência Tatoli, iha Palásiu Governu.
Notísia relevante : Fundu kontributivu kombatente millaun $40-resin iha konta veteranu
Daudaun ne’e komisaun organizadora halo ona preparasaun ba loron veteranu no ohin sei hasoru malu ho estrutura Konsellu Veteranu Munisipál sira hotu hodi aprezenta programa sira.
“Ami-nia programa komemora loron veteranu tinan ne’e maka hakarak realiza iha nasionál no munisípiu sira tanba ita iha planu komemorasaun tinan ne’e sei konvida veteranu sira hosi Brazil, Portugal, Mozabique, Angola, Guiné Bissau, Austrália, Malázia, Nova Zelándia, Indonézia no Prezidente Federasaun Mundiál,” nia akresenta.
Orsamentu ne’ebé aloka ba komemorasaun loron veteranu kada tinan hamutuk $250.000.
Tema ba komerasaun tinan ida-ne’e ita foti mak ‘Hamutuk La’o Bá Oin’.
Iha biban hanesan, ekipa CCLN relata ba Xefe Governu katak daudaun fundu investimentu akumula ona millaun $40 hosi veteranu sira, ne’ebé hein atu halo investimentu.
“Primeiru-Ministru fó apresiasaun ba asuntu rua ohin ne’e. Nia husu ba ami, molok implementa programa ho fundu investimentu ne’e presiza haree didi’ak, ne’ebé ami atu halo investimentu ba banku sei haree kondisaun hotu mak investe, maibé sira seluk hanesan seguransa sivil ita halo ona no hein atu loke bengkel no seluk tan,” Veteranu ne’e tenik.
Jornalista : Arminda Fonseca
Editora : Julia Chatarina
