MOP ajudika direta Empreza Don Boaventura reabilita estrada Lugatoi ne’ebé kuaze kotu
VIQUEQUE, 24 janeiru 2024 (TATOLI)— Diretór Servisu Obra Públika Munisípiu Viqueque, Mario do Rego, informa, Ministru Obra Públika halo ona ajudikasaun direta ba empreza Don Boaventura Unipesoál Lda, atu konstrui estrada iha área Lugatohi, Suku Caraubalu, Postu administrativu Viqueque vila, munisípiu Viqueque tanba estrada refere kuaze atu kotu hodi difikulta movimentasaun transporte públiku.
“Kona-ba estrada Lugatohi, MOP halo ona ajudikasaun direta ba empreza Don Boaventura Unipesoál, Lda atu ka’er obra refere. Orsamentu ne’ebé aloka ba estrada ne’e seidauk prevee tanba sei iha prosesu dezeñu, nune’e bainhira finaliza maka foin prevee orsamentu. Ami sei kontinua esforsu hodi aselera reabilitasaun estrada Lugatohi atu labele difikulta ba ita-nia abitante sira nia movimentu”, dehan Diretór ne’e ba jornalista sira, iha niakna’ar fatin Beloi, kuarta ne’e.
Notísia relevante: Funsionáriu Viqueque ho inisiativa aterru dalan Lugatoi ne’ebé kuaze kotu
Daudaun ne’e, MOP liuhosi Diresaun Estrada halo ona dezeñu ba reabilitasaun no Diresaun Laboratóriu mós halo ona teste ba rai hodi aprezenta ba Ajénsia Nasionál Dezenvolvimentu, Institutu Públiku (AND,IP) atu haree halo aprovasaun hodi hahú reabilitasaun.
Estrada Lugatohi ho luhan metru 6, maibé rai monu beibeik hela metru ida resin.
Ho kondisaun dalan ne’e, nia informa iha tersa dadeer maizumenus tuku 6:00, (23/01) karreta truck ho xapa matrikula A.54-329, hosi Dili, ne’ebé tula sasán ba faan atu baku fila, maibé konsege hetan ajuda hosi karreta pezadu hodi dada sai tiha.
“Estrada Lugatohi hanesan dalan públiku ida iha munisípiu Viqueque, nune’e kotu difikulta movimentu transporte publiku”, nia afirma.
Notísia relevante: Empreza COVEG hahú normaliza estrada Lugatohi Viqueque
Jornalista : Vitorino Lopes da Costa
Editór : Florencio Miranda Ximenes
