iklan

MUNISÍPIU, VIQUEQUE

Funsionáriu Viqueque ho inisiativa aterru dalan Lugatoi ne’ebé kuaze kotu

Funsionáriu Viqueque ho inisiativa aterru dalan Lugatoi ne’ebé kuaze kotu

Funsionáriu Administrasaun Viqueque ho inisiativa aterru aterru dalan Lagatohi, Viqueque, sesta (19/01/2024). Imajen Tatoli/Vitorino Lopes da Costa

VIQUEQUE, 19 janeiru  2024  (TATOLI)Funsionáriu hosi administrasaun munisípiu Viqueque, sesta ne’e, ho inisiativa organiza malu aterru dalan Lugatohi suku Caraubalu, postu Viqueque Vila, munisípiu Viqueque ne’ebé daudaun kuaze monu bá mota.

Xefe Departamentu Ajénsia Dezenvovimentu munisípiu Viqueqque, Rui da Costa, haktuir, funsionáriu inklui Diretór Servisu Munisipál hamutuk lalin rai no fatuk tau ba dalan Lugatohi atu transporte sira bele liu.

“Daudaun ita haree rai kuaze monu hotu ba mota, hela espasu metru ida resin maka hela, entaun transporte hanesan fuzu sira labele liu. Tanba ne’e ohin ami ho inisiativa lalin rai no fatuk hodi taka netik, maski la dura maibé transporte sira bele liu,” Rui da Costa, informa ba Agência Tatoli, iha dalan Lugatohi.

Notísia relevante : Postu Viqueque Vila loke dalan tolu liuhosi implementasaun PMOPA

Aleinde ne’e, bainhira dalan monu, funsionáriu hosi Beloi no Viqueque Vila antiga labele liu dalan Lugatohi ho transporte tanba laiha dalan alternativa, nune’e funsionáriu sira tenke la’o ain maka foin to’o iha fatin serbisu.

“Dalan Lugatoi ne’e importante tebes, maibé agora atu monu hotu ona. Se ida-ne’e maka monu, difikulta funsionáriu inklui abitante lokál hala’o atividade,” nia akresenta.

Iha fatin ketak, Administradór munisípiu Viqueque, Januário Soares ‘Bolly’, husu apoia direta ba Xefe  Estadu Maiór Jenerál FALINTIL- Forsa Defeza Timor-Leste  (F-FDTL), Tenente Jenerál, Domingos Raúl ‘Falur Rate Laek’ hodi tulun munisípiu Viqueque hadi’a dalan foun tanba dalan Lugatohi daudaun ne’e sai amesa ba transporte públiku halo movimentu.

“Ajuda koloka ekipa enjeñaria F-FDTL hadi’a dalan foun ne’ebé sei iha subida barak atu abitante sira bele liu iha ne’ebá. Tanba  kondisaun estrada Lugatohi sai ameasadu tanba hetan erosaun,” Administradór hateten iha resintu eskola Ensinu Báziku Filliál (EBF) Falur Rate Laek, kinta (18/01).

Antes ne’e, Autoridade Viqueque aprezenta prioridade tinan 2023 hodi husu orsamentu hosi fundu kontinénsia hodi loke dalan foun ho ninia  naruk kilómetru 4 hosi Buanurak to’o Eskola Sekunáriu 4 setembru, ho kustu $267.673,39, maibé orasementu la to’o hodi finaliza dalan foun.

“Governu aloka osan ba ami hodi loke dalan foun, maibé ami haree ba kustu boot no  orsamentu ne’ebé ami hetan la to’o, ne’ebé daudaun seidauk bele liu iha dalan foun,” nia tenik.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!