DILI, 25 janeiru 2024 (TATOLI) – Sekretáriu Jerál Komite Olímpiku Timor-Leste (CONTL-sigla Portugés), Laurentino Guterres, informa, tinan ne’e, atleta timoroan bá partisipa jogu olímpiku no Asian indoor and martiál arts Games.
“Ita sei partisipa iha jogu internasionál rua ne’e, ida mak jogu Olímpiku no ida mak jogu Asian Indoor and Martial Arts Games,” informa Sekretáriu Jerál ne’e ba Agência TATOLI iha edifisiu CONTL, ohin.
Jogu Olímpiku ne’e sei realiza iha Fransa hahú fulan juñu to’o jullu no Asian Indoor and Martial Arts Games sei hala’o iha novembru iha Tailándia.
Jogu Asian Indoor and Martial Arts Games fó prioridade ba Arte Marsiál sira mak sei ba tuir tanba ne’e, CONTL sei ko’alia ho Governu atu identifika Arte Marsiál ne’ebé bele ba kompete.
Enkuantu, jogu Olímpiku iha ona atleta na’in-lima hosi modalidade lima hanesan Natasaun, Taekwondo, Atletizmu, Badminton no hertefelizmu.
“Atleta na’in lima ita prepara ba jogu Olímpiku ne’ebé hetan bolsa estudu hodi ba hala’o formasaun iha rai liur ida mak Natasaun, ida hosi Taekwondo, ida hosi Atletizmu, ida hosi Badmintong no ida hosi Hartefelizmu, sira ne’e mak tinan kotuk hetan bolsa estudu hodi duni sira nia pontu no ita fiar katak sira bele kualifika bá partisipa jogu olímpiku,” nia konklui.
Formasaun ba federasaun desportiva
Komite Olimpiku Timor-Leste mós iha planu ona atu fó formasaun ba federasaun desportiva haatn iha área dezenvolvimentu desportu no jestaun administrativu.
“Iha tinan kotuk ita fó ona formasaun ba federasaun Taekwondo no Oky. Nune’e ami planu atu loke tan formasaun ba federasaun haat, maibé sei halo uluk identifikasaun ba kada federasaun,” nia afirma.
Formasaun ne’e, nia dehan ho baze ba orientasaun hosi Komite Olímpiku Internasionál no Federasaun Desportiva Internasionál, atu kada modalidade servisu hamutuk no ativamente halo korespondénsia ho sira.
Tuir nian dezenvolvimentu desportu atu dezenvolve kapasidade federasaun nian oinsá atu jere programa kada federasaun no planu prioridade kada tinan.
Alende ne’e, CONTL mós iha ona planu atu konvida Komite Olímpiku internasional atu mai fó formasaun ba funsionáriu sira ne’ebé servisu.
“Ami hakarak haforsa servisu CONTL mak funsionáriu sira presiza tuir formasaun iha área administrasaun no kapasitasaun rekursu umanu,” katak nian.
Iha mós programa prioridade ida kona-ba servisu entre CONTL ho Komite Olímpiku hosi nasaun li’ur sira hanesan Austrália atu troka ideia ba malu, nune’e bele lori desportu ba oin.
Notísia relevante: Fevereiru, Atleta na’in-rua partisipa kampionatu mundiál natasaun iha Qatar
Jornalista : Hortencio Sanchez
Editór : Florencio Miranda Ximenes
