DILI, 24 janeiru 2024 (TATOLI) – Prezidente Federasaun Natasaun Timor-Leste (FNTL), Laurentino Guterres, informa, iha fulan-fevereiru tinan ne’e, haruka atleta na’in-rua ba kompete iha kampionatu mundiál natasaun ne’ebé realiza hosi federasaun natasaun internasionál iha Doha-Qatar.
“Ita nia atleta na’in-rua konfirmadu ona atu ba kompete iha kampionatu mundiál ne’ebé realiza iha Qatar, hahú iha loron 02 to’o 17 fevereiru, maibé ita nia atleta sei to’o iha 12 fevereiru,” hatete Laurentino ba Agência TATOLI,I.P iha edifisiu Komite Olímpiku Nasionál (CONTL-sigla portugés) Dili, kuarta ne’e.
Atleta na’in-rua ne’ebé konfirmadu atu ba kompete iha eventu internasionál ne’e mak Junior Jolanio no Imelda Felicyta Ximenes Belo.
Notísia relevante: Natasaun prepara kompete Asian Games 2023 iha Xina
Dadaun ne’e, atleta Junior Jolanio halo hela treinamentu iha Bali-Indonézia no Imelda Felicyta hala’o hela treinamentu natasaun iha nasaun Franca.
Ho nune’e, atleta na’in-rua ne’e ida-idak sei viajen direita hosi fatin ne’ebé daudaun sira hela ba liu nasaun Qatar iha 12 fevereiru.
“Ita nia atleta na’in-rua ne’e preparadu tanba sira hala’o hela treinamentu iha rai li’ur, ida iha Paris no ida iha Bali Indonézia, sira ba tuir formasaun ne’e tanba hetan bolsa estudu hosi Komite Olimpiku Internasional iha tinan kotuk,” nia hatete.
Partisipasaun atleta natasaun na’in-rua ne’e mós atu kompleta rekezitu hosi jogu Olimpiku Internasionál ne’ebé sei hala’o fulan-jullu ne’e iha Nasaun Franca.
“Ida ne’e rekezitu ida hosi Komite Olimpiku Internasionál katak atleta natasaun atu ba kompete iha jogu Olimpiku tenke tuir lai jogu kualifikasaun, entaun kompetisaun ida ne’e hanesan mós faze kualifikasaun ikus ida ba sira na’in-rua atu avansa ba jogu Olimpiku Internasionál ne’ebé sei hala’o iha Franca iha fulan jullu mai ne’e, bainhira sira partisipa iha kualifikasaun ne’e hatudu rezultadu di’ak mak sira na’in-rua sei partisipa hotu iha jogu Olimpiku Internasionál,” nia konklui.
Notísia relevante: Atleta natasaun na’in-rua kontinua treinu molok partisipa iha Olímpiku Japaun
Jornalista : Hortencio Sanchez
Editór : Florencio Miranda Ximenes
