Autoridade munisípiu Liquiçá foun hakarak lori governasaun hakbesik ba povu
DILI, 25 janeiru 2024 (TATOLI)—Prezidente Autoridade Munisípiu (PAM) Liquiçá, Paulino Ribeiro, hateten, nia parte iha ona planu prioridade ba munisípiu durante nia mandatu tinan-lima maibé importante liu mak hakarak lori governasaun hakbesik ba povu iha baze.
“Hakbesik governasaun ba povu mak hanesan atendimentu ba públiku hanesan liga ho Billete Indentidade (BI), sertidaun RDTL, kartaun eleitorál, ne’e ba atende komunidade iha kada suku sira atu povu la presiza lakon tempu barak mai to’o iha munisípiu,” Paulino Ribeiro, informa ba Agência Tatoli, iha salaun Ministériu Administrasaun Estatál (MAE), Colmera kinta ne’e.
Aleinde ne’e, nia mós hakarak administrasaun munisipál nakloke ba públiku hahú hosi suku to’o munisípiu hodi halo atendimentu ba públiku servisu durante oras ualu no haforsa, administrasaun hosi suku to’o postu administrativu inklui fó formasaun relasiona ho komputadór no seluk tan.
PAM iha mós programa promove diálogu ho komunidade atu kuidadu animál sira labele husik la’o iha dalan públiku sira tanba munisípiu Liquiçá besik liu Dili no sai mós dalan nasionál.
“Ha’u-nia mandatu hakarak ko’alia ho povu kuidadu animál tenke sulan no kesi, nune’e labele fó risku ba ema halo movimentu, tanba dalarak ita husik animál bele korta ema-nia movimentu hodi hamosu asidente,” nia akresenta.
Notísia relevante : Reprezentante povu husu Governu normaliza mota Laclolema-Liquiça
Vizaun seluk maka autoridade munisipál sei koa’lia ho komunidade hodi implenta programa bairru moos sai matak, saudável no hakmatek hodi komunidade tau lixu iha nia fatin, kuda ai-oan no kuidadu inklui halo lutu haleu hodi labele husik animál han.
Ba setór sira seluk hanesan turizmu, agrikultura, infraestrutura liga ba estrada no jestaun merkadu PAM sei foku iha setór sira hotu atu iha futuru Liquiçá bele hakat ba Kámara Munisipál no bele hetan reseita.
“Ita sei halo konsentrasaun ba estrada rurál no urbana sira iha munisípiu Liquiçá, estrada urbana mak Lauhata, Maumeta no Dato, tanba suku tolu ne’e sai imajen ba munisípiu Liquiçá hotu mak alarga tan ba fatin sira seluk,” nia tenik.
Enkuantu, kona-ba dezentralizasaun maka sei prepara kondisaun hotu, liu-liu preprara infraestrutura báziku hanesan instalasaun ba Kámara Munisipál no Asembleia Munispál seidauk iha, inklui diresaun tolu ka haat hanesan ne’e seidauk iha edifísiu no kondisaun mínimu ba Vise PAM Liquiçá ne’ebé seidauk iha.
“Agora ne’e ita sei foku ba situasaun sira ne’e hotu ona mak ita husu nasionál ba halo avaliasaun, karik bele mak hakat ba eleisaun munispál partidu polítiku sira ba halo kompetisaun sé mak manán nia sei ba kaer poder lokál,” PAM tenik.
PAM Liquiçá, Paulino Ribeiro, hetan pose hosi Ministru Administrasaun Estatál, Tomás Cabral, iha loron 18 janeiru 2024 hodi troka Pedro Paulino.
Orsamentu Jerál Estadu (OJE) 2024 ne’ebé aloka ba munisípiu Liquiçá hamutuk $6.401.407, kompostu hosi saláriu no vensimentu $1.783.867, bens no servisu $797.136 tranferénsia públiku $1.993.369 kapitál menór $138.474, no kapitál dezenvolvimentu $1.688.660.
Jornalista : Arminda Fonseca
Editora : Julia Chatarina
