DILI, 25 janeiru 2024 (TATOLI)—Jestór iha Ajénsia Promosaun Investimentu no Esportasaun, Institutu Públiku (TradeInvest, I.P) propoin ona ba Governu atu kria lei esportasaun hodi fasilita liután empreza nasionál halo esportasaun produtu.
“Desde mandatu VIII Govern, ami propoin ona atu kria lei esportasaun, ninia esbosu para hela iha nível Konsellu Ministru no Parlamentu. Tanba só ho lei esportasaun maka ita bele prevee insentivu balun no istimulu atu istimula produtór sira-nia vontade atu prodús hodi esporta, tanba hanesan investimentu ita iha insentivu fiskál aduaneira maibé ita atu promove esportasaun lei ba ida-ne’e laiha,” Diretór Ezekutivu TradeInvest, I.P, Arcanjo da Silva, hateten liuhosi programa entrevista eskluziva live streaming iha estúdiu Agência Tatoli, Farol, kinta ne’e.
Notísia relevante : TradeInvest no empreza Tsuneishi Shipbulding identifika rai iha Laleia harii estaleiru
Nia dehan, iha mandatu IX ne’e, TradeInvest atualiza fali asuntu ne’e liuhosi Vise Primeiru-Ministru no Ministru Koordenadór Asuntu Ekonómiku, Francisco Kalbuadi Lay, hodi bele diskute.
TradeInveste bele fasilita produtór sira iha rai-laran ne’ebé halo produsaun barak no ninia produtu iha valór ekonómiku a’as, atu buka merkadu ba sira.
“Ami prontu atu fasilita produtór sira ne’e hodi buka merkadu, tanba TradeInvest la’ós promove de’it sira-nia produtu maibé ami promove mós sira-nia kompañia no ema hodi nune’e iha interasaun ho investidór estranjeiru, teknolojia foun no inovasaun foun. Tanba ho vontade di’ak maka ita bele diversifika ekonomia no kria postu serbisu ba joven,” nia fó tenik.
TradeInvest iha knaar apoia Governu implementa polítika no iha definisaun estratéjia kaptasaun investimentu esternu iha país hanesan promove Timor-Leste hanesan lokál investimentu esternu, inklui divulga oportunidade no vantajen investimentu iha país, promove investimentu esternu, no apoia esportadór nasionál ba bens no servisu.
Aleinde ne’e, akolla no orienta investidór atu fó sai informasaun hotu kona-ba investimentu esternu iha Timor-Leste, koordena prosesamentu pedidu investimentu esternu iha país, funsiona hanesan janela únika ba atendimentu investidór externu no propoen medida lejislativa no administrativa ba promosaun no estimulu investimentu esternu iha país.
Jornalista : Antónia Gusmão
Editora : Julia Chatarina
