DILI, 26 janeiru 2024 (TATOLI)—Diresaun Nasionál Transporte Terrestre (DNTT) daudaun ne’e hahú distribui ona xapa matríkula ba veíkulu sira, iha edifísiu Balide.
“Ita husu ba públiku hirak ne’ebé seidauk iha xapa matríkula orijinál karreta no motór, agora bele mai foti ona iha DNTT tanba iha ona xapa matríkula orijinál,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa ba Agência Tatoli, iha ninia knaar fatin, sesta ne’e.
Notísia relevante : DNTT sei distribui xapa matríkula orijinál karreta no motór fulan ne’e
Xapa matríkula orijinál ba karreta daudaun to’o ona B-15402 no ba motór X-1412.
“Xapa matríkula ne’e ita sosa hosi tinan kotuk, distribui mai iha tinan ne’e no sira ne’ebé foun no foin mai rejistu mós ita fornese kedas xapa matríkula orijinál tanba sufisiente hela. Daudaun produsaun xapa matríkula ba karreta iha 7.000 ho kustu $77.000 no motór 30.000 ho kustu $270.000,” nia akresenta.
Antes ne’e, DNTT halo produsaun iha rai-li’ur, maibé agora kontrata de’it empreza xineza, Auto Zone mak sosa nia plaka iha rai-li’ur hodi halo produsaun iha rai-laran.
“Ba tinan ne’e, iha ona orsamentu atu sosa tan, maibé nia kuantidade sei iha diskusaun nia-laran,” nia tenik.
Jornalista : Arminda Fonseca
Editora : Julia Chatarina
