iklan

EKONOMIA, BOBONARO, HEADLINE, MUNISÍPIU

Komunidade halerik bá kondisaun estrada urbana Cailaco-Maliana

Komunidade halerik bá kondisaun estrada urbana Cailaco-Maliana

Kondisaun atuál estrada urbana ligasaun hosi postu administrativu Cailaco ba postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 26 janeiru 2024 (TATOLI) – Komunidade sira preukupa no halerik tebes haree kondisaun estrada urbana ligasaun hosi postu administrativu Cailaco ba postu administrativu Maliana vila, tanba daudaun ne’e obra fíziku ne’ebé konstrui hosi Governu Indonézia kuaze grave no aat totál ona.

Komunidade suku Meligo, Marciana Sose Mau, konta katak, tinan-tinan bainhira akontese udan estrada refere nakfilak sai mota, tanba bee halai fali hosi estrada laran hodi rezulta tahu nakonu no kois, nune’e difikulta movimentasaun transporte públiku no privada.

Notísia relevante: Rai-rahun falun estrada Cailaco provoka komunidade sofre moras IRA

“Ami-nia estrada ne’e ba to’o Maliana mai fali Cailaco, bainhira atu to’o ne’e ita-nia ruin sira-ne’e moras, kolen hotu, udan ami ba Maliana araska tanba bee nalihun iha rai-ku’ak sira-ne’e, bainhira to’o ba ne’e ita fo’er hotu, bokon hotu, ami husu ba governu sé bele haree ami-nia estrada ne’e,” nia ko’alia iha Cailaco, kinta ne’e.

Kondisaun atuál estrada urbana ligasaun hosi postu administrativu Cailaco ba postu administrativu Maliana, munisípiu Bobonaro. Imajen Tatoli/Sérgio da Cruz.

Xefe suku Manapa, Zeferino Loco Bere, reforsa durante ne’e komunidade sira halerik no terus ba kondisaun estrada ne’e, tanba tempu udan difikulta sira atu lori produtu lokál asesu ba merkadu.

Nia husu Ministériu Obra Públika atu prioridade hodi bele rezolve estrada ne’e iha tinan 2024 nia laran nune’e fasilita movimentasaun Maliana ba Cailaco inklui Gleno, munisípiu Ermera.

“Estrada ida-ne’e ita haree la’ós hanesan estrada, maibé ita haree hanesan mota, hanesan natar, tanba udan dezde fulan novembru mai to’o agora ne’e estrada aat hotu, ita ba mai ho motor de’it mos araska la halimar,” nia hateten.

Maibe nia komfirma  katak, daudaun ne’e ekipa tékniku hosi PT Wiratman-JKC consultant iha ona terrenu no halo hela levantamentu Detailed Engineering Desing (DED) ba konstrusaun estrada urbana Cailaco-Maliana hahú hosi Mau-Mali to’o iha Bilimau.

“Iha sesta ne’e ami konsege survey vila laran ne’e hotu, hahú hosi Mumali ba to’o Bilimau ne’e 23 kilómetru de’it, maibé Obra Públika presiza 26 kilómetru, entaun kilómetru 3 ne’e ita survey fali halo hotu ho vila laran ne’e dala-ida. Autoridade postu iha komitmentu atu rekomenda ba governu atubele aselera ninia prosesu,” nia fó hanoin.

Tuir observasaun Jornalista Agência Tatoli iha terrenu nota katak, maske kondisaun estarada ladi’ak, maibé movimentasaun públiku kontinua la’o normál hanesan bainbain.

Enkuantu tuir dadus 2022 postu administrativu Cailaco iha aldeia 24, suku hitu ho totál populasaun 10,347, komposta hosi feto 5101 no mane 5,246 ho totál xefe família 2,107.

Notísia relevante: IX Governu presiza prioriza estrada urbana Maliana ba Cailaco

Jornalista: Sérgio da Cruz

Editór; Evaristo Soares Martins

iklan
iklan

Leave a Reply

iklan
error: Content is protected !!