BOBONARO, 26 agostu 2022 (TATOLI)-Xefe sentru saúde Cailaco, munisípiu Bobonaro, Delfim Bere, konsidera kondisaun estrada públiku Cailaco ne’ebé falun ho rai-rahun provoka komunidade sira sofre moras Infeksaun Respiratória Aguda (IRA) iha tempu bailoron.
Nia akresenta, moras IRA kada tinan sempre domina iha postu Cailaco Iha tempu bailoron.
Enkuantu tuir dadus estatístika iha fulan-jullu tinan 2022 komunidade hamutuk 549 afeta moras ne’e tanba kauza hosi kondisaun estrada halo ambiente la saudável.
Notísia relevante: Estudante iha Cailaco 90% kompleta ona vasina Pfizer
“Fatór ne’ebé influénsia ba moras ISPA ne’e impaktu hosi ita-nia estrada públiku tanba motorizada no karreta liu ba mai rai-rahun suar barak loos. Ita bele hateten katak, Cailaco ne’e nai-ulun sira liu ba mai sempre haree, karik ita liu ba sempre haree dalan ne’e mós gelombang tún sa’e,” nia informa ba Jornalista sira, iha knaar-fatin, Cailaco, sesta ne’e.
Delfim hatutan, kondisaun estrada influénsia komunidade sira sofre moras IRA.
“Ha’u nu’udar servidór ba Estadu nafatin propoin ba Governu atubele haree ita-nia kondisaun ne’ebé iha, liuliu estrada, atu nune’e ita bele halo atendimentu ho di’ak ba pasiente sira,” nia apela.X
Xefe suku Manapa, postu administrativu Cailaco, Zeferino Loco-Bere, reforsa kondisaun estrada ne’e aat dezde okupasaun Indonézia to’o to’o agora.
Nia observa katak, iha kompañia lokál no nasionál barak ona mak halo levantamentu dadus maibé to’o ohin loron seidauk rezolve.
“Kondisaun estrada ne’e hahú hosi Manapa ba to’o Bilimau grave liu, nakonu ho rai-rahun, tempu bailoron bele afeta ba komunidade nia saúde, depois tempu udan ita haree tahu no bee mak nakonu iha laran, ita haree hanesan mota,” Nia haktuir.
Durante ne’e komunidade hosi Cailaco atu ba kapitál Maliana sira ultrapasa de’it mota laran, tanba liuhosi dalan públiku sempre hetan asidente durante viajen.
Situasaun ne’e mós difikulta agrikultór sira lori produtu lokál asesu ba merkadu sentrál Cailaco no Maliana.
“Ita-nia ambulánsia lori inan-feton isin rua sira-ne’e kadavez akontese iha dalan, tanba iha tinan uluk ba ita-nia inan feton ida seidauk to’o Maliana labarik moris de’it iha dalan klaran tanba kondisaun estrada ne’e,” nia haktuir.
Postu administrativu Cailaco iha suku hitu mak hanesan, Purugua, Atudara, Meligo, Manapa, Daudu, Goulolo, Genulai no suku Raiheu, ho totál populasaun 13,969 ho totál xefe família rihun tolu resin.
Notísia relevante: Administradór Cailaco husu IGE normaliza mota Purugua
Jornalista: Sérgio da Cruz
Editór: Evaristo Soares Martins
