PM Xanana Gusmão kuda ai ‘Hapea odorata’ iha Istana Bogor

JAKARTA, 26 janeiru 2024 (TATOLI)—Primeiru-ministru, Kay Rala Xanana Gusmão, akompaña husi Prezidente Joko Widodo, kuda ai ‘Hapoea Odorata’ ka ‘Pohon Merawan’ iha resintu istana Bogor, Jawa Barat, Indonézia.

Hafoin kuda, Xefe governu TL, Xanana Gusmão hamutuk ho xefe Estadu Indonézia, Joko Widodo, lori bee hodi rega ba ai-oan sira ne’e. Tuirmai, Prezidente Joko Widodo, lori bee fakar ba Xanana nia liman hodi fase liman no mós toalla mutin hodi hamaran liman hafoin fila ba Istana Bogor.

Atividade kuda ai-oan ne’e hala’o hafoin liutiha serimónia Prezidente Joko Widodo fó bem-vindu ba Xefe Governu Xanana Gusmão. Kuda ai oan ne’e nu’udar asaun ida hodi hametin liután relasaun bilaterál entre nasaun rua.

Depois ida ne’e, líder rai rua – Timor-Leste no Indonézia, halo enkontru bilaterál hodi hametin kooperasaun bilaterál país rua nian, ne’ebé la’o ona durante ne’e.

Serimónia kuda ai-oan ne’e ramata, tuirmai sei iha konferénsia konjunta.

Notísia relevante:Primeiru-ministru Xanana vizita no fó omenajen ba éroi sira iha Kalibata

Jornalista: Cancio Ximenes

Editór: Rafael Ximenes de A. Belo