JAKARTA, 26 janeiru 2024 (TATOLI)-Primeiru-ministru Kay Rala Xanana Gusmão, sesta ne’e, vizita Jardim dos herois ka Taman Makam Pahlawan Kalibata Jakarta, Indonézia.
Primeiru-ministru ho delegasaun to’o iha semitériu Kalibata iha tuku 07h41.
Hafoin ne’e primeiru-ministru, Xanana Gusmão, fó omenajen ba éroi no martir luta-na’in indonézia nian ne’ebé hakoi iha Kalibata hodi hatuur ai-funan iha monumentu Pancasila.
Hafoin ne’e PM ho delegasaun kontinua ba Bogor hodi diskute kona-ba kooperasaun bilaterál.
Tuir ajenda, molok hala’o enkonru bilaterál, iha oras 09:00 dadeer, sei hala’o vizita ba semitériu erois Kalibata hodi presta omenajen.
Hosi Kalibata, PM Xanana ho delegasaun kontinua ba Palásiu Prezidente Repúblika Bogor-Jakarta sei simu ho parada militár ne’ebé akompaña hananu inu nasionál rai rua nian to’o ramata, PM Xanana akompaña hosi PR Jokowi sei hala’o pasarevista ba formatura parada militár nu’udar onra hosi Estadu Indonézia.
Hafoin formatura, Prezidente Joko Widodo sei fó koñese membru governu Indonézia nian tomak hodi kaer-liman ho PM Xanana no delegasaun membru governu Timor-Leste nian, remata kontinua ba palku palásiu prezidente hodi asina livru.
Iha oras 10:30, Xefe Governu Xanana ho membru governu sei hala’o enkontru bilaterál ho Prezidente Joko Widodo ho membru governu sira iha minutu 30 nia laran hodi diskute kooperasaun bilterál rai rua nian ne’ebé estabelese durante ne’e.
Hafoin ida ne’e, ekipa nasaun rua nian hamutuk ho Xefe Governu Xanana no Xefe Estadu Indonézia kontinua kedas asina akordu formál entre rai rua hodi finaliza Fronteira Terrestre Timor-Leste no Indonézia iha Noel Besi-Citrana Oe-Cusse no Indonézia nian no kontinua kedas ho konferénsia imprensa hosi líder rai rua hodi anunsia rezultadu akordu no kooperasaun.
Vizita ne’e, Xefe Governu akompaña, hosi Ministru Planeamentu Investimentu Estratéjiiku (MPIE), Gastão de Sousa, Ministru Transporte no Telekomunikasaun, Miguel Marques Manetelo, Sekretáriu Estadu Komunikasaun Sosiál (SEKOMS), Expedito Dias Ximenes no ekipa Gabinete Fronteira Marítima no Terrestre.
TMPN Kalibata lokaliza iha avenida ka Jalan Raya Kalibata Nu. 14, RT 14/RW 1, Kalibata, Pancoran, Jakarta Selatan.
Jornalista: Cancio Ximenes
Editór: Rafael Ximenes de A. Belo
