PNTL Viqueque voluntariamente aterru estrada ne’ebé ku’ak
VIQUEQUE, 26 janeiru 2024 (TATOLI)– Polísia Nasionál Timor Leste (PNTL) munisípiu Viqueque, sesta ne’e, ho inisiativa hodi aterru estrada sira ne’ebé ku’ak sira iha postu administrativu Viqueque Vila hodi fasilita movimentasaun transporte públiku no komunidade nia ho di’ak.
“Ami hola parte iha envolve atividade komunidade sira-nia, hodi halo limpeza no taka dalan ku’ak sira-ne’e, atu bee labele naliun iha dalan hodi abitante sira liu karik bele haree hetan dalan”, Komandante PNTL munisípiu Viqueque, Superintendente António Rego Fernandes, hateten ba jornalista sira, área Lugato’i, ohin.
Daudaun ne’e, nia dehan tempu udan, nune’e presiza halo limpeza hodi hamoos valeta sira atubele bee hala’i tuir fatin atu labele nalihun iha estrada.
“Ba ohin, ami sei haree ba dalan Vila laran sira-ne’ebé ku’ak ami sei taka ho rai henek sira atu bee labele naliun iha dalan sira. Atividade ida-ne’e ami sei halo iha semana oin”, Komandante ne’e promote.
Atu nune’e nia dehan, PNTL labele halo de’it atividade servisu operasaun, maibé PNTL mós halo atvidade polísiamentu sira-ne’e hodi juda abitante sira.
Tuir observasaun Agência Tatoli iha tereñu nota katak membru PNTL lalin rai henek hodi taka estrada ku’ak no balun hamoos valeta, lalin fatuk tau ba dalan ku’ak, atividade ne’e hahú tuku 08:00 dader no ramata 11;00 hala’o iha Viqueque Vila.
Enkuantu, iha limpeza no taka dalan ku’ak ne’e envolve direta husi komandante PNTL munisípiu Viqueque no segundu komadante munisípiu Viqueque, komadante PNTL eskuadra Viqueque Vila no membru PNTL munisípiu no postu Viqueque hamutuk 70-resin.
Rekolla reseita $8.480
Polísia Nasionál Timor Leste (PNTL), munisípiu Viqueque liuhusi Unidade Tránzitu rekolla reseita $8.480 ba kofre estadu iha tinan 2023
“Husi tinan 2023 PNTL munisípiu Viqueque rekolla reseita hamutuk $8.480, nune’e ba oin sei kontinua atividade halo check poin hanesan atividade rutina hodi fó hanoin ba komunidade sira atu respeita lei kódigu Estrada númeru 06/2023”, dehan komandante ne’e.
Reseita hirak ne’e, nia dehan rekolla hosi motorista sira ne’ebé laiha karta kondusaun, la uza kapasete no la tau asesoria motór nia no karreta nia hanesan espellu no xapa mátrikula no dokumentu laiha no espiradu ona.
Daudaun ne’e, PNTL Viqueque sensibiliza lei kódigu Estrada ba postu administrativu sira no komunidade iha área rurál atu utuliza transporte públiku tenke kumpre lei kódigu estrada.
“Hafoin, ami halo sensibilizasaun hotu ami sei halo check point ba postu sira atu abitante sira bele kumpri regra tanba iha Viqueque postu Uatulari utilizadór barak la uza kapasete hodi halo movimentu”, nia afirma.
Notísia relevante:MOP ajudika direta Empreza Don Boaventura reabilita estrada Lugatohi ne’ebé kuaze kotu
Jornalista: Vitorino Lopes da Costa
Editór : Florencio Miranda Ximenes
