iklan

HEADLINE, SEGURANSA

Rekrutamentu membru polísia foun hein desizaun husi Primeiru-Ministru

Rekrutamentu membru polísia foun hein desizaun husi Primeiru-Ministru

Ministru Interiór, Francisco da Costa Guterres . Imajen Tatoli/António Daciparu

DILI, 26 janeiru 2024 (TATOLI) –Ministériu Interiór (MI) deside númeru rekrutamentu membru foun ba Polísia Nasionál Timor-Leste (PNTL) ba tinan ne’e sa’e ba 250, maibé MI sei hein desizaun husi Primeiru-Ministru, Xanana Gusmão.

“Ami deside ona númeru efetivu ba rekrutamentu membru polísia foun nian entre 200 no 250. Ami aprezenta ona totál númeru rektutamentu ne’e ba primeiru-ministru. Agora, hein de’it desizaun final iha xefe Governu nia liman”, Ministru Interiór, Francisco da Costa Guterres, hatete iha Caicoli, ohin.

Governate ne’e informa katak  prosesu rekrutamentu ne’e sei lori tempu naruk tanba hahú husi preparativu husi komisaun organizadora ne’ebé atu serbisu ho indpendente, presiza mós haree komisaun ida atu superviziona no monitoriza rektutamentu, presiza mós ekipa júri ida ne’ebé iha koñesimentu kle’an atu bele hala’o prosesu ne’e ho transparánsia hodi hili timoroan ne’ebé atu sai polísia profisionál hodi bele hala’o servisu ho di’ak liután.

“Ita presiza tempu entre fulan hitu no ualu atu bele hetan kadetes foun ida di’ak. Ita sei haree didi’ak sira-nian dokumentu, sei halo teste eskrita, teste saúde, psiko teste, psiko tékniku, ezersísiu fíziku, inklui sira-nian altura. Ne’ebé kritériu sira ne’e presiza kadetes sira tenke kumpre molok anunsia rezultadu. Sé mak liu hodi hakat bá tuir formasaun”, esplika.

Kadetes foun ne’ebé maka atu loke iha tinan ida ne’e sei koloka ba postu sira iha Unidade Polísia Fronteira, Unidade Polísia Marítima, postu sira, inklui Ofisiál Polisiamentu Suku ne’ebé sei falta. “Tanba ne’e, presiza rekruta atu apoia númeru ba fatin sira ne’e hodi reforsa liután serbisu seguransa nian”, dehan.

Deputadu  David Dias Ximenes ‘Mandati’ iha komisaun B Parlamentu Nasionál ne’ebé trata asuntu Defeza no Seguransa hatete rekrutamentu ba membru foun PNTL ne’e pertinente tebes atu bele apoia serbisu polísia hodi garante seguransa.

“Tanba bainhira komisaun B bá halo fiskalizasaun iha fronteira, ami haree iha postu PNTL nian ida iha ne’ebá ema na’in-ida to’o lima de’it, ne’e sala uitoan. Tanba ne’e maka ami husi komisaun B ezije ba PNTL tenke halo duni rekrutamentu ne’e hodi fasilita membru sira bele hala’o serbisu iha postu sira”, deputadu Mandati sujere.

Nia husu atu rekrutamentu ba kadetes foun tenke haree didi’ak, tanba membru polísia foun ne’e atu garante orden no seguransa ba públiku, prevene atu kriminalidade sira, asegura liberdade ba sidadaun sira, inklui respeita legalidade demokrátika sira.

“Polísia la’ós funsionáriu públiku, maibé nu’udar ajente seguransa. Atu sai membru polísia la’ós atu hela iha kuartél, maibé tenke sai bá li’ur katak halo vijilánsia iha komunidade nia leet”, dehan.

Komisaun B nia fiskalizasaun iha fatin sira haree katak prezensa polísia iha komunidade falta tebes, tanba ne’e komisaun sempre kestiona servisu polísia nian, maibé komando sempre responde katak sira-nian ema la to’o.

“Ha’u hein katak bainhira rektutamentu membru foun hotu ona, Komando PNTL bele halo ona buat ruma hodi garante seguransa iha nasaun ne’e, liuliu bele iha ona vizibilidade iha fatin sira ne’ebé maka risku ba problema sira”, espera.

Notísia relevante: Komandu PNTL rekruta membru foun polísia 200 iha marsu

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!