DILI, 26 janeiru 2024 (TATOLI)—Governu liuhosi Sekretaria Estadu Formasaun Profisionál no Empregu (SEFOPE) realiza seremónia despedida ba timor-oan na’in-hitu hodi ba serbisu hanesan estájiu profisionál iha Japaun.
Sekretáriu Estadu Formasaun Profisionál no Empregu interinu , Arsénio da Silva, agradese ba disponibilidade Japaun hodi apoia Timor-Leste fó serbisu ba timor-oan
“Ha’u agradese tebes ba Estadu Japaun, liu-liu Embaixadór iha Timor-Leste ne’ebé iha hanoin di’ak. Tanba Japaun la’ós foin maka apoia Timor-Leste maibé desde ukun-an firme apoia ba Timor-Leste ninia indepedénsia. Tanba ne’e maka agora kontinua. Ho apoiu timor-oan serbisu iha Japaun no apreende buat foun balun hodi mai implementa fali iha ita-nia rain,” atuál Sekretáriu Estadu Kooperativa, dehan.
Antes ne’e, SEFOPE haruka uluk timor-oan na’in-hitu bá sebisu iha Japaun faze dahuluk, kompostu hosi feto haat no mane tolu, enkuantu ba faze daruak nian kompostu hosi feto ida no mane na’in-neen, ne’ebé sei desloka bá Japaun iha segunda (29/01) hodi serbisu durante tinan-tolu.
Notísia relevante : Traballadór na’in-hitu sei arranka tan bá serbisu iha Japaun fulan ne’e
Iha biban hanesan, Aman hosi traballadór, Joaquim Sarmento Pereira, agradese tebes ba Governu nia tulun ne’ebé fó oportunidade ba nia oan.
“Ha’u nu’udar povu agrikultór ida ne’ebé durante ne’e fa’an de’it produtu sira ne’ebé ha’u prodús mak fó eskola ha’u-nia oan. Ha’u-nia oan hetan oportunidade ida-ne’e ha’u agradese tebes ba Estadu Timor-Leste, sira bá Japaun reprezenta nasaun, fiar katak sei hetan buat di’ak mai ami família no nasaun,” Joaquim tenik.
Nune’e mós, Embaixadór Japaun iha Timor-Leste, Tetsuya Kimura, hato’o parabéns ba joven na’in-hitu ne’ebé selesionadu nu’udar grupu daruak hosi Programa Estajiáriu Tékniku (TIT-Technical Intern Trainer Program), ne’ebé sei aranka ba Provínsia Kochi, Japaun.
“Ha’u hakarak agradese SEFOPE nebé organiza ona eventu ida-ne’e no ha’u hakarak mos aproveita oportunidade ida-ne’e hodi espresa ha’u-nia agradesimentu ba Centro Quesadhip Ruak ne’ebé apoia ona joven sira ne’e iha sira-nia preparasaun molok arranka bá Japaun liuhosi programa ida-ne’e, inklui prepara aula lian Japaun nian,” Dipomata ne’e tenik.
Embaixadór nota katak traballadór sira nakonu ho esperansa no espetasaun atu apreende abilidade agríkola iha Japaun no bainhira fila mai, sei kontribui ba konstrusaun nasaun Timor-Leste nian ho abilidade hirak ne’e.
“Hau hein katak ita-boot sira sei hamoris liután setor agríkola iha Timor-Leste ho abilidade sira kona-ba kultivasaun modo no aifuan ne’ebé imi sei hetan iha Kochi, provínsia ne’ebé avansadu liu ein termu agríkola iha Japaun”, Tetsuya tenik.
Pasu daruak ba joven na’in-hitu ne’ebé sei arranka bá Japaun sei abitua ho ambiente foun, no depois apreende lian Japaun, koñese ema Japaun sira barak liután, halo amizade ho sira no familiariza ho kultura, kustume no tradisaun Japaun nian.
“Hau ansiozu tebes atu ko’alia ho ita-boot sira iha lian Japaun iha próximu bainhira ita hasoru malu. Ba família sira ne’ebé atu despede ita-boot sira-nia oan feto no mane, ita-boot sira-nia maun no alin feto sira, fiar ba katak provínsia Kochi sei tau-matan ba sira ho diak tebes. Provínsia Kochi iha esperiénsia barak kona-ba simu estajiáriu tékniku sira no sistema atu fó apoiu ba sira, eziste ona,” nia tenik.
Jornalista : Antónia Gusmão
Editora : Julia Chatarina
