iklan

COVALIMA, HEADLINE

ASSEPPOL diskute  implementasaun programa no oinsá atu dignifika eis-prizoneiru polítiku sira

ASSEPPOL diskute  implementasaun programa no oinsá atu dignifika eis-prizoneiru polítiku sira

Konfrensiste partisipa iha semináriu. Imajen/Celestina Teles.

COVALIMA, 29 janeiru 2024 (TATOLI) – Asosiasaun eis-Prizoneiru Polítiku Timor-Leste (ASSEPPOL-TL) organiza mini konferénsia ho tema “ Hamutuk iha ASSEPPOL Ita Defende Dignidade Umana hodi Garante Sosiedade Ida Livre no Laiha tan Dadur Polítiku”. Atividade ida ne’e realiza atu diskute programa ne’ebé atu implementa no atu dignifika eis-prizoneiru polítiku sira.

Mini konferénsia dahuluk ASSEPPOL nian ne’e hetan apoiu finanseiur husi Servisu Apoiu Sosiedade Sivíl no Autoridade Sosiál (SASCAS) hamutuk $ 2.220 ne’ebé realiza entre 29 no 30 janeiru.

Sekretáriu-Jerál Interinu ASSEPPOL-TL, Metódio Caetano Moniz, hatete konferénsia ne’e atu diskute sobre estatutu ne’ebé sei regula asosiasaun ba tinan lima no ko’alia mós kona-ba programa sira atu implementa, liuhusi rona ideia husi konfrensista sira.

“Organiza mini konferénsia ida ne’e atu rona aspirasaun husi baze, nune’e bainhira realiza konferénsia nasionál bele elabora hamutuk saida mak implementa ne’e mai husi desizaun koletiva. Programa ne’ebé atu  implementa foku  ba  aspetu sosiál , ekonómia, kulturál no dignifika eis-prizoneiru polítiku hodi promove valór rezisténsia ba jerasaun foun”, dehan.

ASSEPPOL-TL kria iha 2002 ho nia vizaun atu harii sosiedade ne’ebé livre, justu, demokratíku no laiha prizoneiru polítiku nomós promove papél eis-prizioneiru iha prosesu luta ba libertasaun pátria hodi tranzmite memória ba jerasaun foun atu aprende,  nune’e violasaun direitu umanu labele akontese tan. Aleinde ne’e, atu hatene mós oinsá eis-prizoneiru sira entrega sira-nian aan to’o prosesu ukun-aan no haluha sira-nian família ho nia aan rasik.

Reprezentante Administradór Munisípiu Covalima, Agustinho Mendonça ‘Ran Nakali’ reforsa  katak ASSEPPOL  foin mak hala’o mini konferénsia dahuluk iha Covalima tanba husi husi nasionál la haluha sofrimentu durante luta ba ukun rasik-aan.

“Atividade mini konferénsia ida ne’e atu diskute no identifika fatin ne’ebé eis-prizoneiru sira hetan detensaun, nune’e presiza atu prezerva fatin hirak ne’e.

Pontu fokál ASSEPOL Covalima, Maria Amaral ‘Bi Ki’ak’,  salienta katak mini  konferénsia ne’e bele aborda di’ak liu implementasaun programa no ASSEPPOL nia distinu iha futuru.

Dadus provizóriu konfrensista ne’ebe partisipa  iha eventu ne’e hamutuk 25 ne’ebe mai husi postu administrativu hitu iha  Covalima.

Notísia relevante: Governu no ASSEPPOL lansa jardín memória viva

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!