CNC, I.P sei oferese bolsa estudu ba sobrevivente nia oan 15
DILI, 29 janeiru 2024 (TATOLI)—Centro Nacional Chega, Instututu Públiku (CNC, I.P) sei oferese tan bolsa estudu ba sobrevivente vulnerável nia oan hamutuk na’in-15, iha tinan ne’e.
Diretór ezekutivu, CNC, I.P, Hugo Maria Fernandes, informa, institutu iha tinan kotuk oferese ona bolsa estudu ba sobrevimente vulnerável nia oan hamutuk na’in-11, nune’e iha tinan ne’e kontinua hetan osan tanba sira-nia valór di’ak.
“Semana oin ita sei asina tan nota entendimentu ho sobrevivente vulnerável nia oan foun hamutuk na’in-15. Ita asina nota atubele hahú ona prosesu bolsa estudu ne’e ba bolseiru sira,” Diretór hateten ba Agência Tatoli, iha ninia knaar fatin, Balide, segunda ne’e.
Notísia relevante : https://tatoli.tl/2023/03/31/cnci-p-fo-bolsa-estudu-ba-sobrevivente-vulneravel-nia-oan-nain-12/
CNC, I.P iha ona akordu ho Ministériu Planeamentu Investimentu Estratéjiku (MPIE) hodi hamutuk ho Fundu Kapitál Dezenvolvimentu Umanu (FDCH, sigla portugés) iha tinan ne’e fó apoia ba sobrevivente nia oan sira.
“Ami iha hela prosesu elaborasaun, enkuantu FDCH aloka ona orsamentu ba bolsa estudu maibé ita seidauk hatene montante orsamentu ba kada estudante. Ami mak sei aprezenta lista,” nia akresenta.
CNC, I.P iha tinan kotuk prevee osan mensál $150 ba kada bolseiru hodi responde ba nesesidade no propina eskola nian.
“Bainhira ita asina ona nota entendimentu mak foin hatene osan mensál ba kada bolseiru ne’e hira,” nia tenik.
Jornalista : Arminda Fonseca
Editora : Julia Chatarina
