iklan

EKONOMIA, HEADLINE

CNC,I.P fo bolsa-estudu ba sobrevivente vulneravel nia oan na’in 12

CNC,I.P fo bolsa-estudu ba sobrevivente vulneravel nia oan na’in 12

Diretór Ezekutivu Centro Nacional Chega (CNC), Hugo Maria Fernandes asina akordu no fó apoiu bolsa-estudu ba Sobrevivente no Vulneravel sira-nia oan iha salaun CNC, tersa (28/03). Imajen Tatoli/Egas Cristóvão

DILI, 31 marsu 2023 (TATOLI)—Sentru Nasional Chega, Institutu Públiku (CNC,I.P,sigla portugés), sesta ne’e, asina deklarasaun ho sobrevivente vulneravel nia oan hamutuk na’in 12 ne’ebe hetan bolsa-estudu kontinua eskola iha nivel ensinu superiór.

Ditetór Ezekutivu CNC,I.P, Hugo Maria Fernandes Maria, hateten bolsa-estudu  ne’ebé CNC fó apoiu ba estudante sira ne’e, haree liuba sobrevivente ne’ebé kbiit-laek.

“Ohin ita fó apoiu bolsa-estudu  ba maluk sobrevivente vulneral sira-nia oan hamutuk na’in 12 hodi hetan edukasaun iha nivel ensinu superiór. Ha’u husu bolsa ne’ebé imi hetan, labele uza hanesan orgullu no previléjiu ida ba imi maibé simu hanesan todan ida ne’ebé ba imi atu selu imi-nia inan-aman nia sofrimentu luta nian hodi kontinua luta ba dezenvolvimentu nasaun nian,” Hugo Maria Fernandes, hateten iha CNC, Balide, Dili.

Ezekutivu ne’e dehan, estudante 12 ne’ebé ohin hetan oportunidade subsidiu  hosi CNC ne’e, tanba  servisu hamutuk parseiru sira hanesan ho Chega Ba Ita Hotu (ACBIT) no sira seluk ne’ebe mak identifika sobrevivente sira-nia oan.

“Subsídiu ne’ebé ita fó estudante sira ne’e, kada fulan sira sei hetan osan $150 Ita haree to’o sira ramata estudu ba iha universidade,” nia dehan.

Nia dehan, atividade CNC fo bolsa-estudu ba estudante sira ne’e, hahú iha tinan kotuk ne’ebe fó uluk bolsa-estudu ba estudante   na’in hitu no tinan ne’e na’in 12. Objetivu ne’e, oinsá hakmaan sobrevivente sira-nia terus no valoriza sira liuhosi fó apoiu ba sira-nia oan asesu ba edukasaun.

Iha fatin hanesan, Diretora ACBIT, Manuela Leong Pereira, sente kontente tanba esforsu ne’ebé ACBIT hamutuk ho CNC halo ohin loron maluk sobrevivente sira-nia balu hahú hetan ona bolsa-estudu.

“Husu nafatin estudante sira aproveita didi’ak oportunidade ida ne’e bele sai matenek hodi servi ita-nia rai. Imi tenke agradese ba oportunidade ne’ebé imi hetan tanba oportunidade ida ne’e, maihosi imi-nia inan-aman nia kontribuisaun no dedikasaun. Agora imi-nia luta mak oinsá lori nasaun ne’e ba oin,” Manuela hateten.

Nune’e, reprezentante hosi bolseiru na’in 12, Ernesto Mendonça,   agradese bá matebian eroi no eroina sira hotu, liuliu ba sira-nia família sira tanba liuhosi luta naruk ne’ebé inan-aman halo ohin loron oan sira bele moris iha situasaun livre nia-laran.

“Ami agradese ba oportunidade ida ne’e, tanba ho apoiu ida ne’e ami hanesan estudante sente bele hakmaan ona ami-nia inan aman nia terus ne’ebé durante ne’e sira hasoru. Tanba ami-nia inan-aman kbiit laek atu suporta ami kontinua eskola maibé ho apoiu ida ne’e ami bele hetan oportunidade eskola iha universidade,” nia hateten.

Nune’e husu mós CNC, ba oin tulun mós ba maluk sira hosi sobrevivente vulneravel nia oan ne’ebé seidauk hetan oportunidade bele apoiu sira atu bele hetan apoiu hosi CNC.

Estudante na’in 12 ne’ebé ohin asina deklarasaun ne’e maihosi univeridade sira hanesan, Universidade da Paz (UNPAZ), Universidade de Dili (UNDIL), Universidade Orientál Timor Lorosa’e (UNITAL), Institutu Siénsia Saúde (ICS, sigla portugés), Universidade Nasional Timor Lorosa’e (UNTL), no Dili Institute of Tecnology (DIT).

Atividade apoiu bolsa-estudu ne’ebé CNC halo ne’e tanba CNC,I.P, hanesan memória esperansa hamriik nu’udar institutu públiku ida ne’ebé estabelese ho dekretu lei númeru, 48/2016 no tutela direitamente ba iha Primeiru Ministru.

Jornalista : Arminda Fonseca

Editora      : Armandina Moniz

iklan
iklan

Leave a Reply

iklan
error: Content is protected !!